mariñapatrimonio

EXCEPCIONAL SAUNA CASTREXA A PIQUES DO DERRUBE.

2011-12-12T02:49:00.000-08:00

Nota de prensa de LugoPatrimonio e MariñaPatrimonio.

A EXCEPCIONAL SAUNA CASTREXA DE CASTAÑOSO A PIQUES DO DERRUBE.

A Fonsagrada , 12 de decembro de 2011.- No extenso concello de A Fonsagrada (Lugo), que conta con numerosos xacementos arqueolóxicos, rexístranse arredor de 70 asentamentos castrexos. Na década dos 80 os sacerdotes D.Enrique López Fernández e D. José Argul Folgueiras realizaron un importante labor de catalogación destes xacementos fonsagradinos, un traballo que viu a luz no libro Fonsagrada y su concejo publicado no ano 1986. Nesta interesante publicación achamos entre os castros estudados o do Castelón de Castañoso.

O Castelón é un castro situado nun abrupto esporón conformado polo rego do Val do Barreiro e o río das Covas. A presenza de minas para a extracción de ouro nas inmediacións do asentamento castrexo, como son as Covas de Teixeira ou as explotacións a ceo aberto da Chaila de Santiago, indícannos que se trata dun castro mineiro.

As defensas naturais do Castelón convertíano nun castro inexpugnable. Estas defensas foron reforzadas mediante profundos foxos, picados na rocha, e mais un torreón ou baluarte defensivo á entrada do poboado. Para chegarmos onda o castro hai que pasar pola “calle dos mouros”, un estreito camiño na dorsal do esporón cunha profunda caída a ambos lados.

O escarpado do terreo, o feito de que non houbese zonas habitadas nas cercanías do castro e a propia natureza, que pechou o monte impedindo durante moito tempo a chegada até o Castelón, propiciou a conservación de numerosos muros das edificacións do castro. Entre estas edificacións cómpre destacar a relevante presenza dunha sauna castrexa. Este importantísimo achado débese aos mencionados D. Enrique López e D. José Argul e aparece recollido xa no citado libro Fonsagrada y su concejo .

As saunas castrexas, tamén coñecidas como pedras formosas ou monumentos con forno, son edificacións monumentais claramente diferenciadas das demais construcións castrexas. Trátase de edificios con planta rectangular, distribuídos en tres salas: a antecámara, a cámara de vaporización e unha cabeceira en forma de ábside onde se atopaba o forno ou fonte de calor. Este tipo de edificacións estaban cubertas a dúas augas por aproximación de fiadas de pedra que conformaban unha falsa bóveda.

Sábese que no territorio ocupado pola cultura castrexa ( norte de Portugal, Galiza e Asturias) só se coñecen 16 monumentos con forno. Destes monumentos en Galiza consérvanse o da Punta dos Prados en Ortigueira; a do castro de Borneiro en Cabana de Bergantiños e, para algúns, tamén a de Augas Santas en Allariz. Polo tanto, a sauna castrexa do Castelón de Castañoso sería a terceira ou cuarta das coñecidas até o momento no territorio galego.

Dende que hai aproximadamente tres anos se rozaron e se abriron de novo os vellos camiños que levan ao Castelón, a súa sauna foi visitada por varios arqueólogos como é o caso de Ángel Villa Valdés, arqueólogo asturiano de recoñecido prestixio e estudoso das saunas castrexas, quen nas Xornadas de Arqueoloxía organizadas en Xinzo pola Universidade de Vigo fala, entre outras , da sauna de Castañoso. (Na seguinte ligazón pode verse o vídeo do seu relatorio: http://tv.uvigo.es/video/42110 )

Comparada coas saunas asturianas e coas outras saunas galegas, a de Castañoso goza dun excepcional estado de conservación, mantendo en pé aproximadamente a metade da falsa bóveda. Esta apóiase sobre unha soa pedra, que de ser movida por un animal, unha persoa ou pola acción da chuvia ou da neve, provocaría que a mellor conservada das saunas castrexas sufrise graves e irreversibles desperfectos.

Por iso, as asociacións LugoPatrimonio e MariñaPatrimonio facemos un chamamento á Dirección Xeral de Patrimonio da Xunta de Galiza para que poñan en marcha unha intervención de urxencia e adopten todas as medidas necesarias co fin de impedir que este Ben que integra o Patrimonio arqueolóxico de Galiza non se deteriore máis e non acabe desaparecendo.

Ligazón fotos: https://picasaweb.google.com/mr.patrimonio/SAUNACASTREXAFONSAGRADA

" Vou canso de todo menos da música"

2011-11-20T01:20:00.000-08:00

A Asociación Sociocultural Mariñapatrimonio organiza, en colaboración coa Asociación ribadense MUSIQUEANDO, o acto de presentación da escolma de artigos de Hernán Naval. " Vou canso de todo menos da música".

O Conservatorio Profesional de Música de Viveiro será o lugar onde se desenvolverá esta presentación o xoves 24 de novembro ás oito e media da tarde.

No acto intervirán Hugo García Presno, director da EMM e D de Ribadeo e

Francisco Luís Rodríguez Guerreiro, profesor e presidente de Mariñapatrimonio

Cultura só recoñece os danos efectuados por particulares en varios castros da Mariña

2011-10-13T01:53:00.001-07:00

Castro Coto da Vela (XOVE) 1956

Patrimonio obriga a retirar os eucaliptos plantados sobre as defensas do castro da Vela (Xove), pero non se pronuncia sobre a agresión do concello de Xove sobre o castro de Sumoas

O Servizo de Patrimonio Cultural da Consellaría de Cultura da Xunta de Galicia recoñece, a través de varias comunicacións remitidas a ADEGA e Mariñapatrimonio, os danos provocados por particulares en tres xacementos da Mariña: Castelo de Celeiro (Viveiro), Castro da Vela e xacemento de Pereiraboa (Xove); pero non se pronuncia sobre os prexuízos exercidos polo concello de Xove sobre o Castro de Sumoas.

Tras as denuncias presentadas por Mariñapatrimonio e ADEGA o pasado mes de xuño, o servizo de Patrimonio da Xunta admite que os danos denunciados nos tres xacementos castrexos son verídicos e, mesmo, obriga a retirar os eucaliptos plantados nun deles, en concreto, no castro da Vela (Xove): “ as remocións de terras da tala e posterior repoboación afectan a área de protección integral do castro. Se non fosen arrincados os eucaliptos que cobren o terraplén da croa, o futuro crecemento das raíces ocasionaría maiores danos estas estruturas defensivas”.

Nos outros dous casos recoñece que se realizaron remocións de terra e repoboacións forestais con eucaliptos que afectaron parte do patrimonio, tal e como afirmaran Mariñapatrimonio e ADEGA. En canto ao xacemento do Castelo de Celeiro (Viveiro), Patrimonio di que “as remocións de terra da plantación deixaron ao descuberto tramos dun muro de pedras pertencentes ás estruturas defensivas do xacemento”. Con respecto ao xacemento de Pereiraboa (Xove) asegura que “no transcurso das inspeccións constátase que neste monte se fixera unha repoboación recente de eucaliptos con maquinaria pesada que puxo ao descuberto varios anacos de cerámica”.

Con estes informes de Cultura queda claro que nos tres xacementos houbo remocións de terra que danaron o Patrimonio. Agardamos que os citados informes disipen as dúbidas daqueles que no seu día nos descualificaron acusándonos de mentir e de non estar capacitados para falarmos de Patrimonio.

Porén, Patrimonio só contestou ás denuncias presentadas que teñen que ver coa actuación de particulares, xa que non se manifestou con respecto á actuación do concello de Xove sobre o Castro de Sumoas, incluído no Inventario Xeral do Patrimonio cultural de Galicia. O Concello despositara varias toneladas de terra sobre o xacemento sen a preceptiva autorización da Dirección Xeral de Patrimonio.

A única información que recibimos ao respecto é a través da prensa, na que se recolle a suposta vontade do alcalde de Xove, Xosé Demetrio Salgueiro, de legalizar o depósito de terras. Confiamos en que a Dirección Xeral de Patrimonio faga cumprir a lei e non utilice un dobre raseiro para medir as infraccións ao patrimonio cultural, dependendo de se o infractor é un particular ou un alcalde. Se en Morás Patrimonio obriga a un particular a retirar as árbores que foron plantadas sen autorización, terá tamén que obrigar ao alcalde de Xove a retirar a terra depositada no castro, tamén sen autorización.

Mariñapatrimonio e ADEGA reiteramos a nosa preocupación polas continuas agresións que se están a producir nos xacementos arqueolóxicos e pola falta dunha política axeitada de protección do patrimonio que, como vemos, acaba revertendo no prexuízo dos propietarios dos terreos afectados.

Dende ADEGA e Mariñapatrimonio seguiremos denunciando aquelas agresións ao patrimonio sobre as que teñamos coñecemento e animando á cidadanía a informar sobre outros casos de maltrato aos bens patrimoniais que son de todas e todos, de xeito que se evite o seu deterioro e desaparición.

Labores de tala e repoboación de eucaliptos danan dúas mámoas nos concellos de Foz e Xove

2011-09-29T14:53:00.000-07:00

Os túmulos foron inventariados tras a denuncia de Mariñapatrimonio e ADEGA

O Servizo de Patrimonio Cultural da Consellaría de Cultura da Xunta de Galicia vén de comunicar a MariñaPatrimonio e a ADEGA o inventariado de dúas mámoas na Mariña de Lugo que até o momento non estaban amparadas legalmente e que hai uns meses foron agredidas con maquinaria pesada utilizada en dúas repoboacións forestais con eucaliptos.

Así mesmo, Patrimonio Cultural recoñece os danos denunciados no mes de xuño por Mariñapatrimonio e ADEGA perante este servizo e o Seprona, requiríndolle aos propietarios a retirada dos eucaliptos plantados sobre un destes túmulos, en concreto, o de Pico da Lebre, no concello de Foz.

A outra mámoa danada é a situada no monte da Canteira, no concello de Xove. Neste caso, a rápida intervención do Servizo de Arqueoloxía de Patrimonio e do Seprona evitou a destrución do túmulo e, malia a sufrir algún dano ao pasar maquinaria pesada porriba, detívose a súa repoboación con pá mecánica.

Peor sorte correu a mámoa do Pico da Lebre que, ademais de verse afectada polo efecto da maquinaria pesada, foi agredida pola repoboación con pá mecánica coa que se realizaron 15 buratos no túmulo, resultando este xacemento arqueolóxico gravemente prexudicado.

Mariñaptrimonio e ADEGA lamentamos unha vez máis estas agresións ao noso Patrimonio cultural e, asemade, a inexistencia dun inventariado completo destes bens arqueolóxicos e dunha política axeitada de protección e conservación do patrimonio cultural, que acaba derivando tamén no prexuízo dos propietarios afectados.

EnlaceFotos: https://picasaweb.google.com/mr.patrimonio/Mamoas

ADEGA e MariñaPatrimonio conseguen que Patrimonio actúe por fin para protexer o xacemento arqueolóxico da Atalaia

2011-09-26T02:43:00.000-07:00

MariñaPatrimonio e ADEGA, asociacións volcadas dende o 2006 na defensa do xacemento arqueolóxico do castro da Atalaia (San Cibrao- Cervo) afectado pola insaciable especulación urbanística, coa inestimable axuda das administracións públicas, felicítanse de ter conseguido que, por fin, a Dirección Xeral do Patrimonio Cultural adopte medidas para protexer as vulnerables estruturas do castro.

Dende que finalizaron as escavacións, ADEGA e mais MariñaPatrimonio viñemos demandando unha intervención no xacemento que evitase o seu deterioramento e preservase as citadas estruturas. A demora en adoptar estas medidas provocou no xacemento danos que denunciamos no seu día.

Hoxe, malia todo, cómpre felicitar aos responsables de Patrimonio por iniciar o tapado dos restos arqueolóxicos e, de maneira moi especial, felicitamos os veciños da Atalaia porque paso a paso, co seu esforzo e colaboración, logrouse salvar este importante ben cultural.

EnlaceFotos: https://picasaweb.google.com/mr.patrimonio/TapadoRestosArqueoloxicosCastroDaAtalaia

O patrimonio arqueológico de A Mariña no 2º Congreso Internacional de Arqueoloxía de Vilalba.

2011-07-19T03:56:00.001-07:00

O 2º Congreso Internacional de Arqueoloxía de Vilalba, organizado polo Museo de Prehistoria e Arqueoloxía de Vilalba e que terá lugar nesta vila entre os días 20 e 23 de xullo, contará coa presenza do patrimoinio arqueolóxico da Mariña a través de tres ponencias que estudan diferentes aspectos dos xacementos arqueolóxicos da praia de Area en Viveiro, do castro da Atalaia en San Cibrao e o xacemento do paleolítico inferior do río Covo en Cervo.

Entre as ponencias deste congreso, as relacionadas coa Mariña son:

“Pesca e marisqueo no xacemento de Area (Viveiro, Lugo)”

“Marisqueo, pesca e forxa no Castro de Punta Atalaia(San Cibrao, Lugo), avance de resultados do cuncheiro”. O cuncheiro obxecto de estudo foi parcialmente destruído polo concello de Cervo no ano 2006 con motivo da construción do polémico e inacabado observatorio de aves.

“Novos achados inferopaleolíticos na Área Cantábrica Lucense”. Estudo sobre os útiles líticos do paleolítico inferior que Mariñapatrimonio localizou en distintos puntos da Mariña como a enseada de Cegoñas – A Rega (Ribadeo); A Pampillosa en Foz e en Cervo os localizados na Senra, Trasbar , Viladesuso , Guioncho así como o destacado xacemento das terrazas do río Covo, onde se levan atopado máis de vinte útiles.

Dende Mariñapatrimonio amosamos a nosa satisfacción porque o Patrimonio arqueolóxico da Mariña sexa motivo de estudo por especialistas de recoñecido prestixio e estea presente neste 2º Congreso Internacional de Arqueoloxía.

Nesta ligazón pódense ver fotos do concheiro da Atalaia https://picasaweb.google.com/mr.patrimonio/CuncheiroDoCastroDaAtalaia

e dos útiles líticos atopados na Mariña. https://picasaweb.google.com/mr.patrimonio/UtilesLiticosPaleoliticoInferior?authkey=Gv1sRgCML1z6qbhL2TggE

Petróglifos podomorfos nas Anzas (Ribadeo).

2011-07-12T04:28:00.000-07:00

Mariñapatrimonio informou o pasado mes de xuño ao Servizo de Patrimonio Cultural da Xunta de Galicia sobre a existencia dun posible petróglifo podomorfo nas Anzas (Ribadeo). Trala inspección do xacemento polos técnicos do Servizo de Patrimonio, este ben cultural foi incluído no inventario de xacementos arqueolóxicos da Dirección Xeral do Patrimonio, co nome de “As fádegas- as pisadas do Encanto” e coa clave GA 27051023, converténdose no primeiro petróglifo atopado en Ribadeo e o primeiro podomorfo da Mariña.

Este tipo de petróglifos son gravuras que representan a pegada do pé; aparecen nun pequeno número de penedos próximos á costa , especialmente na zona occidental da provincia de Pontevedra .

As gravuras de As Anzas reciben o nome de “As pisadas do encanto”, atópanse nos lindes da horta de produción ecolóxica de Elia e Vicente, coñecida como As Fádegas, nun vello camiño ao son do río Grande ou Alesancia, que ía dende as Anzas até Salcedo. Nesta rocha hai representadas unhas 11 pegadas do pé do Encanto e dúas cazoletas.

Relacionado con este petróglifo hai un valioso patrimonio inmaterial. Segundo recolle a lenda, nunha gran rocha á beira do río habita un Encanto, unha moza fermosa e loira que deixou as pegadas dos seus pés na laxe do camiño. Polo San Xoán a moza aparéceselles aos que pasan por alí amosando a súa fermosura e mailos seus tesouros así como unha galiña coa súa rolada de pitos de ouro. A beleza da moza ou a cobiza do ouro, fai que a xente se achegue á rocha , o que provoca o seu encantamento , ficando para sempre no interior da rocha.

Mariñapatrimonio quere agradecerlles a asociación Cultural Alesancia das Anzas e en especial a Elia e Vicente a súa colaboración, que contribuíu a que hoxe estes petróglifos estean inventariados e gocen da protección que recolle a lei para este importante ben cultural.

Ligazón para as fotos: https://picasaweb.google.com/mr.patrimonio/AsPisadasDoEncantoAsFadegasAsAnzasRibadeo

Conferencia: “Os petróglifos. Gravuras rupestres ao aire libre” a cargo do arqueólogo Antonio de la Peña Santos

2011-06-28T13:45:00.000-07:00

Antonio de la Peña é un dos máis recoñecidos expertos en gravuras rupestres. O próximo sábado 2 de xullo impartirá unha conferencia sobre os petróglifos en Galiza. A conferencia terá lugar no Museo do Mar de San Cibrao, comezará ás 20h e a súa entrada é libre e gratuíta.
Sen dúbida, esta é unha boa oportunidade para coñecer máis e mellor a manifestación artística máis xenuína da prehistoria galega.
Os petróglifos abundan especialmente nas Rías Baixas, aínda que tamén se atopan noutros lugares de Galiza. Dos primeiros que apareceron na Mariña lucense, tívose noticia a través de Mariñapatrimonio, trátase dos petróglifos do castro da Atalaia (San Cibrao- Cervo). Posteriormente esta asociación informou ao Servizo de Patrimonio Cultural da Xunta de Galiza a existencia doutros na Mariña, como os do castro do Coído en Cervo, os do castro de Burela en Burela e os do castro de Rueta en Cervo. Este último é un petróglifo con temática xeométrica, catro círculos unidos por un trazo, e constitúe o único destas características na Mariña.
Os catro petróglifos mencionados atópanse xa no inventario do Patrimonio Cultural de Galiza , considerados como Bens de Interese Cultural (BIP), polo que gozan da máxima protección que contempla a lei.
Mariñapatrimonio informou tamén a Patrimonio sobre un posible petróglifo en Ribadeo, que aínda non foi estudado por Cultura.
Estes achádegos abren a posibilidade de que, cun estudo sistemático nesta zona, aparezan outros que aporten novos datos para o estudo desta interesante manifestación cultural.

Velaí unha reseña do conferenciante Antonio de la Peña:

Antonio de la Peña Santos é arqueólogo. A súa actividade investigadora diríxese con preferencia cara á Idade do Bronce, á arte rupestre, ao mundo castrexo e ás orixes da cidade de Pontevedra. Desempeña o cargo de Conservador dos Fondos Arqueolóxicos do Museo Provincial de Pontevedra.
Participou en máis dun cento de congresos e reunións científicas da súa especialidade e en numerosas campañas de escavacións arqueolóxicas, dirixindo 23 campañas en 26 xacementos, entre eles os asentamentos de Lavapés, Torroso, Santa Tegra e a ponte do Burgo. Tamén localizou, catalogou e levantou calcos de máis de medio milleiro de complexos da arte rupestre galaica.

É membro de varias institucións culturais -como as Seccións de Arqueoloxía e de Historia da Arte do Instituto de Estudios Galegos, o ICOMOS, o Instituto Cultural Galaico-Minhoto, a Asociación Arqueolóxica Viguesa, o Centro de Estudios Históricos de Pontevedra, as Asociacións Profesionais de Arqueólogos de España e de Galicia, a Asociación Pola Defensa da Ría de Pontevedra, a Sociedade Para o Avance do Pensamento Crítico (ARP), a Franca Irmandade de Pontevedra, a Asociación Amigas e Amigos do Camiño Portugués a Santiago, etc.- e do consello de redacción de varias publicacións periódicas de tema arqueolóxico e histórico -como Ars Praehistorica, Pontevedra Arqueológica, Brigantium, El Museo de Pontevedra ou Pontevedra. Revista de Estudios Provinciais-. Académico correspondente da Reial Académia Catalana de Belles Arts. Premio Turoqua no 2003 e Cidade de Pontevedra no 2004.

Leva pronunciadas máis de trescentas oitenta conferencias e publicados vintedous libros e máis de douscentos setenta artigos en publicacións de tema arqueolóxico.

ADEGA e MariñaPatrimonio denuncian ao Conselleiro de Cultura ante a Fiscalía polo Castro de Atalaia

2011-06-15T07:52:00.000-07:00

Ambas organizacións presentamos esta hoxe diante da Fiscalía unha denuncia contra o Conselleiro de Cultura e Turismo, Roberto Varela, por non cumprir coa lexislación de protección patrimonial e non velar pola conservación do xacemento arqueolóxico Castro da Atalaia, sito en San Cibrao, no Concello de Cervo. Tras un ano desde que a Dirección Xeral de Patrimonio resolvese ditar o tapado provisorio do xacemento escavado ante o seu posible deterioro, e a pesar das reiteradas chamadas de atención feitas por MariñaPatrimonio e ADEGA ante a Consellaría, a día de hoxe aínda non se cumpriu dita resolución e o ben arqueolóxico está a sufrir danos irreparables.

A degradación do xacemento comezou no ano 2006, cando o Concello de Cervo concedeu licenza para a construción de tres edificios sobre o Castro da Atalaia. Tras as denuncias de ADEGA e MariñaPatrimonio, a anterior D.X. de Patrimonio determinou paralizar as obras, pero para cando chegou a orde de paralización, a construtora Promociones San Ciprián xa tiña destruído totalmente unha das parcelas do xacemento. Posteriormente, procedeuse á escavación en área das outras dúas parcelas non afectadas e a Comisión Territorial de Patrimonio Histórico de Lugo e a Dirección Xeral de Patrimonio pronunciáronse a favor da conservación in situ dos restos arqueolóxicos e en contra da construción dos edificios alegando a grande importancia destes restos.

En xuño de 2010, a D. X. de Patrimonio ditou a resolución na que obrigaba a Promociones San Ciprián a tapar novamente as parcelas escavadas no Castro da Atalaia, no que apareceron importantes estruturas dun asentamento galaico-romano, para protexer o xacemento. Nese mesmo mes Mariñapatrimonio comunicaba a caída dun muro dunha das cabanas do xacemento por mor das choivas e demandaba da Consellaría de Cultura a toma das medidas oportunas. Posteriormente, no mes de novembro, a mesma organización comunicaba á D.X. de Patrimonio os danos causados sobre os restos arqueolóxicos tras a caía duns taboleiros de considerable tamaño desde o alto da obra paralizada.

Unha vez denunciados os feitos, a Delegación de Cultura de Lugo e a Dirección Xeral de Patrimonio emitiron dous expedientes nos que recoñeceron os danos descritos e engadiron outros como: “o anegamento das áreas escavadas”, “o debilitamento dos perfís “ así como “o forzamento das portas de acceso” e “o depósito incontrolado de restos de entullo, material de obras e lixo”. Tamén recoñeceron que “é obvio que unha continua e prolongada influencia das condicións meteorolóxicas adversas producirán un incremento do deterioro”.

Pero estas resolucións da Administración non se están a cumprir e o xacemento atópase nun grande perigo de desaparición. É por iso que Mariñapatrimonio e ADEGA urxen a actuación da Fiscalía para que depure responsabilidades e para que o máximo responsable público neste eido, o conselleiro de Cultura e Turismo, Roberto Varela, asuma a súa obriga de protexer e conservar o patrimonio histórico-cultural de todos os galegos e galegas.

Na seguinte ligazón, póndense ver fotos do Castro de Atalaia: https://picasaweb.google.com/mr.patrimonio/CASTRODAATALAIAFOTOS

Moutillós, enclave normando

2011-06-02T13:45:00.000-07:00

Manuel Miranda, a carón da área que consideran foi
unha fortificación normanda. JOSÉ Mª ÁLVEZ

Recollemos aquí o interesante artigo sobre o posible asentamento normando do Vicedo da xornalista Cristina L. Felipe publicado hoxe no xornal El Progreso.

02/06/2011 - Cristina L. Felipe / El Progreso (O Vicedo)

De poucos se sabe porque non están á vista, xa non existen ou se modificaron tanto que non se recoñecen, pero o litoral mariñán conta cun importante número de restos arqueolóxicos de asentamentos que non só se reducen ós castros. As invasións normandas deixaron a súa pegada na comarca en forma de fortificacións que falan dun pasado que, hoxe, mentes inquedas se afanan por estudar e sacar á luz. Unha destas localizacións é Moutillós, ó pé da praia vicedense de San Román.

A historia deste achádego comeza na indagación do profesor de Xornalismo da USC e investigador Manuel Gago, moi interesado nas invasións normandas en Galicia, das que existe documentación aínda que ata agora non estaban concretadas localizacións físicas. Trátase do mesmo estudo que o levou a descubrir aí a base dunha antiga fortificación en Foz, que aporta base real á lenda do Bispo Santo. O caso do Vicedo é diferente, pois non sería un afortalamento dos nativos contra as invasións, senón un asentamento dos invasores, nin máis nin menos o primeiro asentamento normando que se coñece en Galicia.

O historiador Manuel Miranda, da asociación Mariña Patrimonio, axudou á identificación de Moutillóns do seguinte xeito: «Gago comentaba que estes asentamentos son coñecidos como motas», así que empezou a buscar topónimos coincidentes ca palabra mota que puideran ter relación con estes afortalamentos, e así atopou Moutillós, o primeiro, aínda que asegura que existen máis. As motas «son montículos de terra levantados de forma artificial que funcionan como defensa, unha especie de protocastelo». Porén, as motas normandas teñen unha particularidade, pois «á parte do montículo tiñan un recinto onde estarían resgardadas as casas». Son as «‘motte & bailey’», engade Gago, que son habituais na Normandía francesa e nas Illas Británicas a partir da invasión de Inglaterra do ano 1066». O sitio arqueolóxico de Moutillós, di Miranda, «é unha fotocopia exacta das motas normandas».

«Sabíase que en Moutillós había un xacemento e considerábase que podía ser un castro, pero non ten nada que ver», asegura o de Mariña Patrimonio. Gago apoia esta afirmación argumentando que o lugar vicedense ten unha configuración específica dentro dos asentamentos fortificados costeiros da Mariña, pois a súa estrutura, «máis que castrexa ou propia da Idade de Ferro, revela interesantes coincidencias cos sistemas defensivos ‘motte & bailey’; é dicir, consta dun foxo, unha pequena muralla externa e unha mota artificial no centro, próxima ao cantil, que revela unha noción militar diferente á da Idade do Ferro tan abundante na costa luguesa».

O profesor cre necesaria unha investigación máis profunda para revelar a cronoloxía do asentamento. Na opinión de Miranda, «sen unha excavación é imposible saber se é unha mota normanda. A toponimia coincide e a estrutura tamén». Incluso a localización semella ideal, pois está nun alto da praia cun porto natural que conforman Os Castelos. «O sitio está escollido, non é casualidade que se asentaran alí», conclúe.

Danos ao Patrimonio nos concellos de Viveiro e Xove(Lugo).

2011-06-02T05:51:00.000-07:00

ADEGA e MariñaPAtrimonio denunciamos perante O Servizo de Patrimonio da Xunta de Galiza e o SEPRONA posibles danos provocados nos xacementos arqueolóxicos de o castro do Castelo de Celeiro (Viveiro) , o castro do Coto da Vela e un castro próximo a Pereiraboa, ambos en Xove. Estes danos son consecuencia da tala e posterior plantación do monte de eucaliptos con maquinaria pesada.

Dende estas asociacións comprobamos como nos citados xacementos arqueolóxicos se fixeron remocións de terra con pas mecánicas para a apertura de novos camiños, chegando mesmo a cortar os parapetos de defensa dun castro. Estas remocións de terra con medios mecánicos tamén se levaron a cabo na posterior replantación do monte, que deixou á vista restos arqueolóxicos: cerámica, muíños... que evidencian os danos provocados nos xacementos.

Unha vez máis preguntámonos onde están os poderes públicos, Concellos e Xunta, que por lei teñen a obriga de velar e protexer o Patrimonio que é de todos.

Non deixa de ser paradóxico que o poder público coa máxima responsabilidade na defensa do Patrimonio, a Xunta de Galiza, sexa a mesma que autoriza as talas con maquinaria pesada en xacementos arqueolóxicos inventariados, sabendo a destrución que provoca o uso desta maquinaria.

Estes danos no Patrimonio son habituais; existen informes que demostran como estas prácticas forestais ocasionan a maioría das destrucións que sofre o Patrimonio de Galiza.

Dende ADEGA e MariñaPAtrimonio agradecemos a colaboración cidadá e animamos para que sigan informándonos sobre estas desfeitas e así intentar entre todos poñer freo á destrución do noso Patrimonio.

Fotos Coto da Vela

https://picasaweb.google.com/mr.patrimonio/CastroCotoDaVelaXOVE#

Fotos Pereiraboa
https://picasaweb.google.com/mr.patrimonio/CastroProximoAPereiraboaXove#

Fotos O Castelo de Celeiro
https://picasaweb.google.com/mr.patrimonio/CastroCasteloDeCeleiro#

Agresión ao xacemento arqueolóxico do castro de Sumoas (Xove).

2011-05-30T04:19:00.000-07:00

As asociacións ADEGA e MariñaPatrimonio denunciamos perante o SEPRONA e o Servizo de Patrimonio da Xunta de Galiza a agresión que está a sufrir o castro inventariado de Sumoas no concello de Xove (Lugo).

Membros destas asociacións comprobamos que unha morea de camións de terra foron depositados sobre este xacemento. Entendemos que este recheo é ilegal e constitúe unha grave agresión ao Patrimonio arqueolóxico de Galiza, polo que pedimos a inmediata paralización deste entullo e se concreten as responsabilidades penais, civís e administratrivas que esta agresión conleve, así como a retirada do material que conforma o recheo.

Mariñapatrimonio e ADEGA lamentamos que os poderes públicos, o Concello de Xove e maila Xunta, que por lei teñen a obriga de protexer o Patrimonio sexan incapaces de detectar unha agresión destas dimensións nun xacemento perfectamente coñecido e inventariado.

FOTOS:

https://picasaweb.google.com/mr.patrimonio/CastroDeSumoas?authkey=Gv1sRgCP6ngJbbnI71pQE#

A poutada do oso

2011-04-12T13:41:00.000-07:00

"Velaquí unha novela que profundiza na realidade colonial do país, no abandono e na morte do campo, na neurose dos que renegan da súa xente e da súa propia cultura e na forza que ten nos seres humanos a emoción e todo aquilo que amamos nalgún momento da nosa vida. Velaquí tamén unha novela na que explora os labirintos da vida e da sociedade actual."

O escritor e crítico literario Manuel López Foxo reseñaba así a á novela "A poutada do oso" do escritor monfortino Lois Dieguez no acto de presentación organizado pola nosa Asociación e desenvolvido no salón de actos de Caixa Galicia, en Viveiro. E engadía:

"Eu non sei se esta é a mellor novela de Lois Diéguez, mais do que si estou convencido é de que nesta novela están tamén algunhas das mellores páxinas da prosa galega de todos os tempos".

O acto comezou coa proxección do audiovisual "De albre de espranza a "Poutada do oso", un resume da vida e da obra de Lois Diéguez onde ademais do traballo literario do escritor están recollidas, tamén, a súa entrega total aos colectivos e organizacións nos que participa. Colectivos como LUGO PATRIMONIO organización da que Lois é presidente e , en palabras do presentador do acto, Francisco Luís Rodríguez Guerreiro, "unha persoa fundamental á hora de explicar o nacemento de Mariñapatrimonio , pois el foi un dos que nos apadriñou e aínda hoxe nos segue animando nesta tarefa de defensa do Patrimonio".

Lois Diéguez, A poutada do Oso

2011-04-04T14:12:00.000-07:00

O próximo día 8 de abril, venres, ás 20,30 h. a Asociación
sociocultural Mariña Patrimonio e mais a editorial Laiovento,
presentarán a novela de Lois Diéguez, A poutada
do Oso, no salón de actos de CaixaGalicia de VIVEIRO.
Este acto iniciarase coa proxección do dvd De Albre de
espranza á Poutada do Oso. Deseguido intervirán: Francisco
Luís Rodríguez Guerreiro (presidente de Mariña
Patrimonio), Manuel López Foxo (crítico literario), e o
autor.

Entre as 19,30 e as 20,30 h. Lois Diéguez estará á vosa
disposición para a sinatura de libros,

As repúblicas de homes libres foron presentadas en Foz

2011-02-20T15:21:00.000-08:00

Cunha exposición fresca e dinámica de Manuel Gago, infinidade de preguntas foron compartidas cos asistentes a este acto celebrado o venres na Casa da Cultura de Foz. O relator fixo un rápido resumo das investigacións realizadas ao longo dos dous últimos anos, sobre todo pola costa atlántica, pero tamén polas comarcas interiores e pola Mariña de Lugo.

Manuel Gago deixou claro ao inicio da súa exposición que non se trata dun traballo de investigación histórica propiamente dito, senón máis ben dun labor de divulgación periodística. O seu obxectivo é poñer en evidencia a gran cantidade de indicios dunha intensa, confusa e axetreada actividade humana na Galicia dos cinco ou seis séculos que van desde o fin do Imperio Romano ata a Baixa Idade Media e na que están involucrados galaico romanos, suevos, normandos, vikingos... Trátase da etapa máis descoñecida da nosa historia e non tivo ata agora a atención que se merece por parte dos investigadores, seguramente por falta de documentación escrita e porque o labor arqueolóxico se centrou máis en etapas anteriores, como a prerromana.

A Mariña de Lugo aparece como un espazo tremendamente interesante pola súa orientación directa cara os pobos invasores do norte de Europa, e os indicios desta etapa son moi abundantes e próximos; sen embargo, permanecen ocultos aos ollos do noso tempo debido a que non temos unha imaxe definida do que buscamos, como ocorre, por exemplo, cos antepasados castrexos, máis estudiados e divulgados.

As repúblicas de homes libres de Manuel Gago son pezas dun puzzle tremendamente complexo que da pistas da existencia dunha fascinante fotografía dos séculos escuros da Alta Idade Media galega e mariñán e convídannos ao intrigante xogo de compoñela peza a peza.

A demostración dun ferreiro complementa a exposición sobre o ferro, que segue en itinerancia

2011-02-20T14:09:00.000-08:00

Continúa a súa itinerancia a exposición "A industria do ferro no norte de Lugo e no occidente astur". Nos ultimos días estivo en Viveiro, no IES Vilar Ponte e actualmente permanece no CEIP de Cervo. Nestes dous centros de ensino foi complementada e enriquecida cunha interesante demostración a cargo do ferreiro Telmo Cao. O alumnado dos centros puido ver e participar directamente no proceso de traballo do ferro a través desta forxa portátil que está resultando enormemente atractiva para a rapacería. A seguinte etapa da exposición e demostración será ante os escolares de San Cibrao.

Conferencia de Manuel Gago Mariño: “República dos Homes Libres: o territorio como defensa entre o Imperio Romano e a alta Idade Media”.

2011-02-13T08:14:00.000-08:00

A asociación cultural MariñaPatrimonio, en colaboración coa asociación A Pomba do Arco, organizan este venres día 18 unha conferencia sobre a época comprendida entre o final do imperio romano e o xurdimento da Idade Media. Trátase dun período de loitas, de invasións, de ausencia de poder establecido e de incursións de piratas viquingos. Son tempos moi convulsos que afectaron a toda Galiza e, como non, a esta Mariña Lucense.

O poñente desta charla é Manuel Gago Mariño, nado en Palmeira, Ribeira no ano 1976, é doutor en C.C. da Información pola Universidade de Santiago, así como director de culturagalega.org., o portal de divulgación cultural do Consello da Cultura Galega, e profesor asociado de ciberxornalismo na Facultade de C.C. da Comunicación da Universidade de Santiago.

O profesor Manuel Gago é autor de numerosas publicacións de referencia sobre xornalismo electrónico e temas de historia e arqueoloxía galega que se poden ver no seu blog www.capitulocero.org. Na actualidade está desenvolvendo as súas investigacións no tema do proceso de fortificación e defensa de Galiza entre a caída do Imperio Romano e a Baixa Idade Media.

Na súa conferencia, na que se poderán ver varias imaxes de sistemas defensivos e castelos, vainos falar de algo que seguro é bastante descoñecido na nosa Mariña, como son os castelos e os refuxios naturais empregados polos mariñáns para protexerse dos ataques, incursións navais e invasións. Se ben é certo que hai moi poucas noticias documentais, tamén é certo que a arqueoloxía sacou á luz moitas pezas e achados que nos obrigan a formular a nosa historia dunha maneira bastante distinta a como nos tiñan acostumados.

As asociacións Mariña Patrimonio e A Pomba do Arco, convidan a asistir a esta conferencia a toda aquela persoa que teña interese por coñecer a historia deste momento de fins do Imperio Romano, que terá lugar o Venres 18 ás 20.30 na casa da cultura de Foz.

Danos no Castro da Atalaia

2010-11-12T01:01:00.000-08:00

Malia a existencia dunha resolución da Dirección Xeral de Patrimonio que obriga a Promociones San Ciprián a tapar os restos das estruturas das edificacións atopadas no Castro da Atalaia, este xacemento segue deteriorándose por incumprir dita resolución.

En xuño de 2010 a Dirección Xeral de Patrimonio ditaba unha resolución que obrigaba a Promociones San Ciprián a tapar novamente as parcelas escavadas no castro da Atalaia no que apareceron estruturas moi importantes dun asentamento galaico-romano. Este tapadp provisorio contémplase como a única maneira de protexer as estruturas aparecidas en tanto non se consoliden e se poñan en valor. O tapado dos restos terán que realizalo arqueólogos e será financiado polo promotor

O 28 de xuño de 2010 Mariñapatrimonio denunciou a caída dun muro dunha das cabanas por mor das fortes choivas que deixara o temporal. Novamente, un temporal sacudiu estes días A Mariña e novamente o xacemento arqueolóxico sofre desperfectos por non ter cumprido o promotor a resolución de Patrimonio.

Nesta ocasión os danos foron causados por mor duns taboleiros de considerable tamaño que caeron sobre os restos arqueolóxicos dende o 5º piso da obra paralizada que Promociones San Ciprián ten a carón do citado xacemento.

Mariñapatrimonio lémbralles ao promotor, ao Concello e a Patrimonio que teñen a obriga de protexer o xacemento adoptando as medidas necesarias que garantan esa protección.

Por iso, esixímoslles ao Concello e a Patrimonio que actúen con dilixencia para que o promotor cumpra a resolución e protexa este ben patrimonial antes de que sexa demasiado tarde.

ligazón para as fotos.

http://picasaweb.google.com/mr.patrimonio/CastroAtalaiaDanosCausadosPorTaboleiros

MARIÑA PATRIMONIO ENTREVISTASE CO DIRECTOR XERAL DE PATRIMONIO PARA TRATAR SOBRE O CASTRO DA ATALAIA

2010-10-26T12:14:00.000-07:00

Hoxe foron recibidos na Dirección Xeral de Patrimonio, en San Caetano, dous membros da xunta directiva da Mariñapatrimonio. Na reunión, solicitada pola asociación, participaron Rey Pichel, director xeral de Patrimonio, un técnico da Consellaría e os directivos Manuel Miranda Ruiz e Francisco Luís Rodríguez Guerreiro.

Na entrevista, os membros da asociación amosáronlle ao director xeral a súa inquedanza pola situación na que se atopa o importante xacemento arqueolóxico da Atalaia, en San Cibrao.

O Director Xeral reiteroulles aos membros da asociación o mantido na última resolución da Xunta de Galiza pola que os restos achados no castro de Punta Atalaia, no concello de Cervo, deben ser conservados in situ debido ao seu valor arqueolóxico e histórico. Tamén lles lembrou aos directivos de Mariñapatrimonio que a conservación dos restos é incompatible cos proxectos construtivos que se proxectaban para esa área.

Tanto Miranda Ruiz como Rodríguez Guerreiro manifestaron ao remate desta entrevista a súa conformidade coas medidas tomadas pola Dirección Xeral de Patrimonio e advertiron que van seguer co seu labor divulgativo e reivindicativo sobre o Castro da Atalaia.

A asociación comunica tamén que está a espallar este mostra excepcional do patrimonio coa exposición itinerante arredor do Castro da Atalaia que nestes días percorre os centros de ensino da comarca atopándose na actualidade aberta no Instituto de Secundaria “Marqués de Sargadelos”, na localidade de San Cibrao.

RIOTORTO: FESTA DA CULTURA ENCONTRO DE ASOCIACIÓNS CULTURAIS

2010-09-23T11:16:00.000-07:00

Venres, 24 de setembro

19:30h. Inauguración das exposicións

Olladas de muller

A exposición consta de 34 fotografías en cartón-pluma tamaño grande, o que a converte nun xeito moi interesante de achegarse ás diferentes OLLADAS DE MULLERES que teñen as moi diversas mulleres da Mariña.

Destrución da paisaxe

Fotografía e instalacións de novos artistas da Mariña

O castro de Atalaia

A asociación pretende con esta exposición chamar a atención sobre a vergoñenta situación na que se atopa este importante xacemento castrexo de San Cibrao, ameazado na actualidade por unha actuación urbanística que nunca se debeu iniciar.

Exposición sobre Rosalía de Castro.

Significa a presentación en Lugo dunha exposición sobre Rosalía de Castro elaborada pola Fundación Manuel María.

20:00h. Pregón a cargo do actor Luís Iglesia Besteiro

20:30h.Inauguración das casetas das asociacións culturais

20:45h.Presentación do proxecto”Unha Casa Museo para Manuel Maria”

22:00h.Concerto - Homenaxe a Mini e Mero

Susana Seivane

Os Tres Trebóns

A Quenlla

Os Miñotos.

Ugia Pedreira.

Xabier Díaz.

Xesús Mato.

Marica Campo.

Afonso Blanco.

Sábado, 25 de setembro

11:00.Roteiro polo patrimonio e a historia. Os castros, os ferreiros, os mazos, as caleiras e as casas grandes.

11:00h.Ciclo de documentais. As folgas xerais en Galiza, Carvalho Calero, Entre dúas linguas e Uxio Novoneyra.

14:00h.Xantar de Galiza Nova

16:00h.Inauguración da Feira do libro e do disco galego.

Presentación de:

17:00h. Xosé Chao Rego. Bernardo García Cendán e Marcos Maceira.

18:00h. Rosalía, o clamor da rebeldía. Pilar G.arcía Negro

19:00h. Noente paradise, de Ugia Pedreira e Raquel Miragaia.

16:30 Tuppersex

O principal obxectivo do obradoiro TUPPERSEX é favorecer cunha metodoloxía lúdica e formativa, e desde unha perspectiva feminista, o autocoñecemento da anatomía fisiolóxica de cadaquén, para rachar cos falsos mitos, tabús e prexuízos que existen arredor do sexo contribuíndo a que tanto mulleres como homes poidan coñecer mellor a súa sexualidade. O obradoiro busca tamén facilitar a adquisición, desenvolvemento e interiorización de hábitos sexuais saudábeis e seguros, así como a mellora da autoestima.

20:00h. A galegofobia
Emilio González(Psiquiatra),
Xoán Carlos Garrido(Filosofo)
María do Carmo García Negro(Economista)

22:00h Recital da xeración dos 80

Pepe Cacamo

Cesáreo Sánchez

Xulio Valcarcel

Luísa Castro

Manuel Forcadela

Xavier Seoane

Miguel Anxo Fernán Vello

Xavier Rodríguez Baixeras

Domingo, 26 de setembro

11:30 h. Feira do libro

Espectáculos para as nenas e nenos

12:00h Magin Blanco con A nena e o grilo

13:00h Anxo Moure e a súa bici biblo

Exposición de oficios tradicionais e instrumentos musicais

16:00 Campionato de bolos

16:00h. Aberto de billarda.

17:00h. Maratón de curtas. A tola, O Cadaleito, Os Crebinsky, Miguel Goteira e novos criadores....

NOVO PETRÓGLIFO NA MARIÑA

2010-09-22T04:17:00.000-07:00

MariñaPatrimonio comunicoulle recentemente ao Servizo de Patrimonio Cultural da Consellería de Cultura, a aparición, de forma casual, dun novo petróglifo

Este novo petróglifo presenta temática xeométrica canónica (4 círculos concéntricos unidos por un trazo) e sería o primeiro en aparecer na Mariña con estas características. É o exemplar máis setentrional de arte rupestre en Galiza, e presenta grandes similitudes con exemplos atopados no sur de Galiza e nas Illas Británicas.

No ano 2008, MariñaPatrimonio xa comunicara a aparición de petróglifos no Castro da Atalaia de Cervo.

Estes excepcionais achádegos poden aportar novos datos para o estudo da prehistoria en Galicia e confirman a gran importancia arqueolóxica da Mariña.

LugoPatrimonio viaxa a Cervo

2010-08-04T12:51:00.000-07:00

Día 7, sábado
Viaxe a Cervo para visitar a Fábrica de Sargadelos, o Pazo dos Marqueses, Paseo dos Namorados, Museo Histórico de Sargadelos, xardíns do Pazo. E tamén, en San Cibrao: o Museo do Mar, a carpintaría de Ribeira da familia Fra e o Castro da Atalaia.

A Pomba do Arco celebra as XV Xornadas de Historia Local.

2010-07-29T10:37:00.001-07:00

Os vindeiros 2,3,4 e 5 de Agosto a Casa da Cultura de Foz vai acoller a décima quinta edición das Xornadas de Historia Local que como ven sendo tradicional a Asociación Socio-Cultural A Pomba do Arco organiza na vila focega na primeira semana de Agosto.

A Pomba do Arco considera que estas xornadas estanse a converter en toda unha referencia na labor de résgate e de posta en valor da historia de Foz, como un todo, dentro do que é a historia de Galiza. Nunca entendemos desde A Pomba do Arco a historia local como un micromundo do saber concreto e moito menos un aparte que servise de refuxio ao reino da erudición. A historia local para nos é un xeito de achegarnos ao mundo desde o que nos é máis cércano e unha forma de comportarnos como galegos nun mundo globalizado.

As mulleres e os homes que formamos parte da Pomba do Arco sentémonos satisfeitos do traballo desenvolto ao longo destes trece anos, non por dar consolidado unha actividade que nace da sociedade e ao marxe das institucións, senón pola nosa modesta contribución a dotar ao Concello de Foz dunha historia de seu. Nunca acreditamos na existencia de pobos sen historia, e o tempo transcorrido desde a primeira edición das xornadas fixeron bo este axioma do que partimos aló polo 1995.

O luns 2 de Agosto darán comezo as Xornadas cunha charla concerto a cargo de Mini e Mero, membros fundadores do grupo “Fuxan os Ventos”, que levará como título “Os cantares de Foz” no que estes dous veteranos músicos cantarán cantigas de cego referidas a nosa zona así como cantares característicos do Concello de Foz. Neste sentido queremos destacar que Mini e Mero inclúen no seu repertorio catro temas novos que son “O Máis enxebre de Foz”, “Da fraga da degolada” e “Sr Roque” dous temas con letra de Xosé Ramón de Boni que se cantaron en Foz nos anos 40 e 50 e que reflicte feitos da vida local dese ano así como “El nuevo Poblador”.

O Martes 3 de Agosto o Profesor Antón Niñe, persoa dunha importante bibliografía sobre a historia local, impartira unha conferencia sobre os 70 anos do Colexio Martínez Otero, onde repasará a historia deste centro educativo. Antón Niñe acompañará a súa intervención cunha proxección de diapositivas que recolle fotos das promocións de focegos e focegas que pasaron por este centro educativo ao longo desta sete décadas. A maiores Antón Niñe referirase ás ordes relixiosas que rexentaron o centros (menesianos, maristas e salesianos) así como aos fitos máis destacados deste colexio.

O Mércores 4 de Agosto intervirá Alba Díaz, unha nova investigadora, Licenciada en Historia, natural de Nois, que está a preparar a súa tese de doutoramento sobre o cambio social e a conflictividade rural na Galiza das catro últimas décadas. Alba Díaz. Alba Díaz presentara un traballo co título “ O rural de Foz.1960-1980”, no que analizara os cambios sociais e económicos que se viven fora da vila neste periodo tanto no plano económico, como demográfico, como cultural, facendo destaque que vai ser este período onde as entidades que conforman o Concello viven a súa máis importante transformación como consecuencia da perda do peso demográfico pero tamén pola modificación da súa estructura de producción.

As xornadas fecharanse o Xoves 5, cunha intervención do Profesor Ramón Reimunde, sobre “A literatura de tradición oral no Concello de Foz”, na que este veterano estudioso da nosa literatura e da nosa lingua fará unha achega a nosa tradición oral, tanto aquela de caracter anónimo como aqueloutra de poetas populares como Boni, Campá ou o Escolástico. O profesor Reimunde tamén dará a coñecer vellas coplas focegas, algunhas do século XIX, recollidas no marco dun traballo de investigación sobre a tradición oral na nosa Comarca.

As conferencias celebraranse as 20:30 horas na Casa da Cultura focega, querendo desde A Pomba do Arco convidar a todos os veciños de Foz e da Mariña de Lugo destas xornadas. Nesta ocasió o cartel das xornadas correspondese cunha foto de Foz Ruth Matilde Andersen, tomada no ano 20. Paralelamente as Xornadas a Casa da Cultura Focega acollerá unha exposición sobre “O Castro da Atalaia” da autoría de Mariña Patrimonio.

Concello e construtor non cumpren coas súas obrigas

2010-07-24T03:23:00.000-07:00

Concello e construtor non cumpren coas súas obrigas e Patrimonio entérase dos estragos producidos no castro da Atalaia, grazas á acción dos veciños e de MariñaPatrimonio.

MariñaPatrimonio informou o 28 de xuño de 2010 ao servizo de patrimonio cultural sobre a caída dun muro nunha das vivendas do castro da Atalaia por mor das intensas choivas rexistradas na pasada primavera.

Trala visita ao xacemento realizada polo arqueólogo da Xunta, a xefa de servizo de patrimonio cultural remitiunos un escrito onde se nos informa que “ o muro afectado pertence á vivenda mellor conservada” e que “ ao inundarse a zona debeu producirse o seu colapso”; engade ademais, e é o máis preocupante, que “non se pode descartar que o derrubo fose provocado(...) xa que unha das portas fora forzada e incluso depositárase escombro preto das estruturas arqueolóxicas”.

Dende a Dirección Xeral de Patrimonio instan ao Concello á “adopción de medidas que garantan que non se volva producir a entrada nos solares de xente non autorizada” e lembran que unha resolución desta Dirección Xeral obriga o contrutor “a adopción de medidas de protección, co tapado provisional dos restos arqueolóxicos”.

Estes feitos, derivados da meteoroloxía adversa ou pola acción imprudente dalgunha persoa, evidencian a vulnerabilidade do xacemento e o seu deterioramento.

MariñaPatrimonio apoia esta resolución do Director Xeral do Patrimonio Cultural posto que o tapado provisional é a medida máis acaída para protexer as estruturas das inclemencias climatolóxicas así como dos posibles desaprensivos. Asemade, esíxelle a Patrimonio un maior control do que suceda no castro, ao construtor que cumpra canto antes a resolución de Patrimonio e ao Concello que, tal e como recolle a Lei, tome as medidas cautelares necesarias para protexer este ben patrimonial .

Tendo en conta os beneficios que o castro da Atalaia lle pode proporcionar a San Cibrao, cómpre que Patrimonio, construtor e Concello cheguen canto antes a un entendemento para que sexa posible comezar os traballos de recuperación e posta en valor deste importante xacemento.

Nota de prensa de MariñaPatrimonio sobre os acordos da Dirección Xeral de Patrimonio en relación co castro da Atalaia

2010-07-19T03:41:00.000-07:00

Coñecidos os acordos da Dirección Xeral de Patrimonio en relación co castro da Atalaia, MariñaPatrimonio quere expresar a súa satisfación tras conseguir que a Xunta de Galicia decida conservar o xacemento e recoñeza o seu extraordinario valor arqueolóxico.

Queremos en primeiro lugar felicitar os veciños de San Cibrao que se opuxeron á destrución deste xacemento así como felicitar tamén a todas as persoas e asociacións que colaboraron na defensa do castro.

Por suposto, felicitamos á Dirección Xeral de Patrimonio pola súa atinada decisión e recoñecemos o esforzo do señor alcalde, Alfonso Villares, por enmendar os gravísimos erros cometidos polo anterior equipo de goberno, do que formaban parte José Insua, José manuel Balseiro e o propio Alfonso Villares, ao conceder as licenzas de obra, malia coñecer a existencia dun xacemento arqueolóxico, e ao non acatar a orde de paralización ditada por Patrimonio. O resultado destas accións foi a destrución de 1600m2 deste excepcional xacemento.

MariñaPatrimonio volverá solicitar unha reunión co Conselleiro de Cultura para, ademais de achegarlle os nosos parabéns pola decisión adoptada, nos garanta que non se vai permitir ningunha nova construción enriba do xacemento, dado que queda claro tanto nos acordos da Comisión Provincial de Patrimonio como nos informes dos técnicos de Cultura así como nos acordos da Dirección Xeral de Patrimonio que a conservación dos restos é incompatible cos proxectos construtivos. En definitiva, agardamos que estes acordos non dean pé a interpretar a posibilidade de construír cun novo proxecto ou co xa existente, pero maquillado. A conservación do xacemento é incompatible con calquera proxecto urbanístico.

Así mesmo, MariñaPatrimonio continuará traballando para que se clarifique o nivel de responsabilidade do Concello na destrución do Patrimonio por outorgar licenzas presuntamente ilegais e non obedecer a orde de paralización ; do construtor pola presunta destrución de patrimonio arqueolóxico inventariado ;da empresa de arqueoloxía contratada polo construtor que realizou as escavacións e do anterior equipo de Patrimonio da Xunta de Galicia por presuntas irregularidades.

A nosa asociación estima que o castro da Atalaia pode chegar a ser o gran referente arqueolóxico do norte de Galiza e apoiará todas as accións que a Xunta de Galicia e o Concello de Cervo leven a cabo para acadar este obxectivo.

Primeiro trunfo dos veciños de San Cibrao e de MariñaPatrimonio

2010-07-16T16:11:00.000-07:00

Primeiro trunfo dos veciños de San Cibrao e de MariñaPatrimonio que despois de 3 anos de loita conseguiron que a Xunta de Galiza decida conservar o castro da Atalaia e non permita continuar construíndo sobre o xacemento.

Abaixo podedes ler o comunicado da Xunta. Proximamente dende MariñaPatrimonio faremos unha valoración máis detallada sobre este feliz acontecemento.

A Dirección Xeral de Patrimonio acorda a conservación in situ dos restos do castro de Punta Atalaia, no concello de Cervo

Dos estudos realizados despréndese que podería tratarse dun dos asentamentos antigos de meirandes dimensións da Mariña lucense

Lugo, 16 de xullo de 2010.- A Dirección Xeral de Patrimonio resolveu que os restos achados do castro de Punta Atalaia, no concello de Cervo, deben ser conservados in situ debido ao seu valor arqueolóxico e histórico.

A Dirección Xeral estima que pode tratarse dun dos asentamentos de meirandes dimensións da Mariña lucense, que se estende cara ao mar, cara a terreos de dominio público marítimo terrestre, polo que podería dar lugar a un gran proxecto arqueolóxico.

Os restos exhumados evidencian unha complexidade urbanística froito dunha longa e continuada ocupación e transformación deste espazo, que está na orixe da vila de San Cibrao. Na súa orixe é adscribible ao período galaico-romano, no cambio de era e primeiros séculos despois de Cristo, á que se superpoñen estruturas medievais.

Os estudos realizados destacan a extensión, densidade e variedade das estruturas arqueolóxicas documentadas, pero tamén a recuperación de abundantes materiais nobres, vitais para a interpretación do xacemento, evidenciando a súa vinculación coas actividades marítimo-pesqueiras e o comercio, testemuñado pola abundancia de restos cerámicos de importación.

En definitiva, a Dirección Xeral de Patrimonio entende que os valores do asentamento o fan merecedor de ser conservado como ben integrante do Patrimonio Cultural de Galicia, sometido ao réxime de protección establecido na lei que regula este tipo de bens –Lei 8/95, de 30 de outubro-.

A conservación dos restos é incompatible cos proxectos construtivos que se proxectaban sobre esta área. Foron estas actuacións, en concreto a construción dun edificio na zona, as que nun primeiro momento confirmaron a existencia de restos arqueolóxicos, e conduciron a unha prospección máis en profundidade das zonas que aínda non se viran afectadas.

Realizáronse escavacións en área na case totalidade da superficie que ocuparían as vivendas aínda non executadas, evidenciando a importancia dos achados e obrigando, polo tanto, á adopción de solucións protectoras para os restos.

Consellería de Cultura e Turismo

Asociacións culturais da Mariña chaman a homenaxear o Martes 13 a Rosalía de Castro en Burela

2010-07-12T15:12:00.000-07:00

As asociacións culturais da Mariña organizan o vindeiro Martes 13 de Xullo a partir das 20:00 h no Parque Rosalía de Castro de Burela un acto de homenaxe a Rosalía de Castro coincidindo co 125 aniversario da morte da nosa poeta nacional. Este acto responde a intención do movemento cultural da Comarca de dignificar, divulgar e poñer en valor a obra desta grande escritora así como reivindicar o uso público e o carácter laico do panteón de Santo Domingos de Bonaval onde está enterrada e que ven de ser fechada ao público polas autoridades eclesiásticas.

Os colectivos culturais convocantes do acto consideran fundamental lembrar o patrimonio que nos legou esta grande galega que non se cingue só a unha obra poética aínda hoxe non superada e que a cada vagada cobra máis actualidade senón ao conxunto do seu corpo literario e tamén da súa actitude vital, que senta as bases para a recuperación escrita do idioma que nos é común e nos identifica como galegos e galegas.

O acto a celebrar en Burela o Martes 13 consistira nunha lectura de tres textos de Rosalía a cargo do escritor Miguel Sande, da xornalista Olga Castro e do pintor Celso Dourado cuxas intervencións intercalaranse con actuacións musicais a cargo do grupo burelés Dambara. Asemade as asociación organizadoras do acto darían lectura ao poema de Curros “Na morte de Rosalía” como reivindicación da autora homenaxeada e tamén como demanda da actualidade e da vixencia das esixencias do poeta de Celanova.

As asociación que organizan este acto chaman a toda poboación da Mariña a sumarse a esta homenaxe en Rosalía a Burela e considera prioritario a participación nesta actividade festiva do maior número de persoas posíbel, tanto polo necesario recoñecemento de Rosalía de Castro como pola urxente reivindicación da apertura do Panteón de Galegos Ilustres, baixo unhas mínimas condicións en canto a horarios, titularidade e aconfesionalidade do recinto

Asemade os colectivos convocantes que tamén están adheridos a Plataforma nacional que promove unha homenaxe nacional para o 15 de Xullo en Compostela a Rosalía queren convocar a todos os mariñaos a participar desta xornada en Compostela e lembrar que haberá autobuses desde A Mariña para acudir a Compostela. Aquelas persoas que pretendan acudir a manifestación poden chamar ao Tlf:608-555-010.

AC. Francisco Lanza. C.Cultural Ollomao, AC. A Pomba do Arco, C. Cultural Buril, MariñaPatrimonio, AC. Arrincadeira, AC. O Milleiro, Irmandade San Caetano, AC.Mardouro, AC. Anduriña.

Sala de Arte da Casa da Cultura de Burela Exposición: O CASTRO DA ATALAIA. UNHA MOSTRA EXCEPCIONAL DO NOSO PATRIMONIO

2010-07-10T05:32:00.000-07:00

COÑECER O PATRIMONIO PARA PROTEXELO.

Coa exposición O CASTRO DA ATALAIA. UNHA MOSTRA EXCEPCIONAL DO NOSO PATRIMONIO, pretendemos que a cidadanía coñeza este valioso xacemento arqueolóxico e o patrimonio histórico que se pode chegar a perder, se a Xunta de Galicia permite a súa destrución para que un construtor edifique sobre o xacemento.

A exposición inaugurarase o próximo día 12 de xullo ás 20 h na Sala de Arte da Casa da Cultura de Burela, onde poderá ser visitada até o día 30 de xullo en horario de 11 a 23 h e de 18 a 20h (de luns a venres) e de 18 a 20h os sábados.

MariñaPatrimonio demanda que a Dirección Xeral de Patrimonio tome as medidas oportunas que garantan a protección e a conservación do castro da Atalaia

2010-06-30T03:23:00.000-07:00

MariñaPatrimonio comunicou á Dirección Xeral de Patrimonio a deterioración que se está a producir no xacemento arqueolóxico do castro da Atalaia en San Cibrao (Cervo).

O recente temporal de choivas, que afectou de maneira especial á Mariña, provocou a caída dun dos muros atopados nas últimas escavacións arqueolóxicas.

MariñaPatrimonio demanda que a Dirección Xeral de Patrimonio tome as medidas oportunas que garantan a protección e a conservación do xacemento, tal e como contempla a lei.

(LEI 8/1995, DE 30 DE OUTUBRO, DO PATRIMONIO CULTURAL DE GALICIA TÍTULO II REXIME XERAL DE PROTECCIÓN E CONSERVACIÓN DO PATRIMONIO CULTURAL DE GALICIA CAPÍTULO I REXIME DE PROTECCIÓN E CONSERVACIÓN Artigo 25. Deber de conservar. 2. Os poderes públicos garantirán a protección, conservación e enriquecemento do patrimonio cultural de Galicia.)

Instamos, ademais, a que de maneira urxente se adopten medidas de consolidación e conservación das estruturas do castro para evitar que poidan producirse máis desperfectos neste valioso xacemento.

Ligazón fotos: http://picasaweb.google.es/mr.patrimonio/CaidaDunDosMurosAtopadosNasUltimasEscavacionsArqueoloxicasDoCastroDaAtalaia?authkey=Gv1sRgCLv62YO74aDnDg #

MariñaPatrimonio esíxelle á Dirección Xeral de Patrimonio que teña en conta os informes da Comisión Provincial de Patrimonio

2010-06-17T02:11:00.000-07:00

MariñaPatrimonio esíxelle á Dirección Xeral de Patrimonio que teña en conta os informes da Comisión Provincial de Patrimonio e que definitivamente adopte unha posición sobre o castro da Atalaia, que non pode ser outra que a conservación do xacemento e a anulación das licenzas de obra. Deste xeito, remataría o vergoñento ataque ao noso Patrimonio provocado pola irresponsabilidade do anterior goberno municipal de Cervo,que outorgou as licenzas aínda que sabía da existencia do xacemento, e pola inoperancia dos anteriores equipos de Patrimonio.

A Comisión Provincial de Patrimonio vén confirmar o que MariñaPatrimonio leva expresando sobre a enorme importancia do xacemento arqueolóxico da Atalaia en San Cibrao.

Os informes destacan a excepcionalidade e a importancia dos restos atopados cando afirman:

“Neste emprazamento estratéxico hai vestixios dende a Idade de Ferro ata os nosos días.Este aspecto confirelle unha especial relevancia para o coñecemento da historia da Mariña Lucense”

“O interese do conxunto vese incrementado polo escavado no outro soar, e pola continuidade do xacemento arqueolóxico cara ao Norte e Oeste (…) O poboado orixinal podería roldar as 8 Ha (…) Podería ser un dos asentamentos de época galaico-romana de maiores dimensións da Mariña Lucense.A súa importancia viría dada pola súa posición estratéxica, vinculada co mar e polo tanto coas actividades mariñas e co comercio, testemuñado pola abundancia de ceramica de importación.”

Os técnicos e a Comisión Provincial de Patrimonio, de maneira unánime, desbotan calquera posibilidade de construción nas dúas parcelas nas que estaba previsto edificar 59 vivendas e aconsellan que os restos arqueolóxicos sexan conservados in situ , tal e como se pode observar nos seguintes parágrafos:

“Proponse como acordo desta Comision o pronunciamento a favor da conservación in situ dos vestixios arqueolóxicos e a consideración de que o proxecto arquitectónico con licenza municipal para este predio é incompatible co anterior.”

“Á vista do antedito polos servizos técnicos do Departamento Territorial, a Comisión adopta por unanimidade o seguinte acordo: Informar a favor da conservación in situ dos vestixios arqueolóxicos e a consideración de que o proxecto arquitectónico con licenza municipal para este predio é incompatible co anterior.”

Dende MariñaPatrimonio continuaremos traballando para que o castro da Atalaia se convirta nun dos referentes arqueolóxicos de Galiza.

O CASTRO DA ATALAIA NO MUSEO DE LUGO

2010-06-10T13:21:00.000-07:00

Desde o pasado día 7 de xuño a exposición, “O CASTRO DA ATALAIA: unha mostra excepcional do noso Patrimonio” está aberta no Museo Provincial de Lugo.

A mostra foi inaugurada nun acto que contou coa participación de moitos amigos e amigas que se achegaron na tarde do luns día 7 ao Refectorio do Museo, lugar onde estará a disposición dos visitantes até o día 20 de xuño.

O acto deu comezo coas amábeis palabras de benvida da Directora do Museo, Aurelia Balseiro, que tamén se encargou das presentacións.

De seguido, Francisco Luís Rodríguez Guerreiro, presidente de Mariñapatrimonio, interveu facendo un breve resume das accións levadas adiante polos veciños de San Cibrao, no ano 2007, para impedir a desfeita deste xacemento arqueolóxico excepcional; recoñeceu a importancia das iniciativas da asociación ecoloxista ADEGA, que desde un primeiro momento denunciou públicamente esta destrución e, comprometeuse, en nome de Mariñapatrimonio, a seguer divulgando a enorme importancia deste xacemento. “É a nosa intención—dixo—que esta exposición percorra toda a comarca da Mariña Luguesa e se poda visitar nas principais cidades do país”.

O historiador Adolfo de Abel Vilela interviú en representación da asociación LugoPatrimonio lembrando tamén outras incomprensibeis actuacións na cidade de Lugo, permitidas hai anos, desde unhas institucións que deberían ser as primeiras en protexer e conservar o Patrimonio.

O deputado Antonio Veiga Outeiro, en representación da Área de Cultura e Deporte da Deputación de Lugo que patrocina esta mostra, pechou o acto manifestando que é obriga das Institucións como a que el representa, o dar apoio ao movimento asociativo e comprometeuse a seguer nesa liña de actuación.

A mostra, despois desta presencia na cidade da muralla, percorrerá varios concellos da comarca en datas e locais que no seu día daremos a coñecer.

O Castro da Atalaia

2010-06-04T14:05:00.000-07:00

O CASTRO DA ATALAIA: unha mostra excepcional do noso Patrimonio.

2010-06-04T12:34:00.000-07:00

Mariñapatrimonio inaugura o vindeiro luns día 7 de xuño, ás oito da tarde, no Refectorio do Museo Provincial de Lugo a exposición: O CASTRO DA ATALAIA: unha mostra excepcional do noso Patrimonio.

A asociación pretende con esta exposición chamar a atención sobre a vergoñenta situación na que se atopa este importante xacemento castrexo de San Cibrao, ameazado na actualidade por unha actuación urbanística que nunca se debeu iniciar.
A mostra é un traballo de Mariñapatrimonio que conta co patrocinio da Área de Cultura e Deporte da Deputación de Lugo e coa colaboración do Museo Provincial de Lugo, da asociación LugoPatrimonio e de ADEGA.

A exposición permanecerá aberta até o día 21 de xuño no Refectorio do Museo Provincial.

A EXPOSICIÓN ITINERANTE SOBRE A INDUSTRIA DO FERRO CHEGA A XOVE

2010-05-28T13:07:00.000-07:00

A exposición itinerante, realizada pola Asociación Mariñapatrimonio, sobre a industria do ferro chega a XOVE onde vai estar aberta no Centro Cívico deste concello até o día 31 de maio.

A mostra, que leva por título “ A industria do ferro no norte de Lugo e no occidente astur”, recolle a orixe e a evolución histórica do traballo do ferro nesta zona, os lugares de extracción e traballo (explotacións mineiras, ferrarías, mazos e forxas), a elaboración de obxectos de corte e tres lugares sobranceiros na dedicación á manufactura de obxectos de ferro: A Pontenova, Riotorto e Taramundi.

A exposición estará aberta aos visitantes de 18 a 21 horas no Centro Cívico do Concello de Xove.

Novo xacemento arqueolóxico e unha nova agresión ao patrimonio.

2010-05-27T14:30:00.000-07:00

MariñaPatrimonio comunicou recentemente á Consellería de Cultura e ao Concello de Cervo o achado casual dun novo xacemento arqueolóxico en San Cibrao (Cervo). Trátase, case con total seguridade, dun castro costeiro ubicado no polígono industrial de San Cibrao, a 1,5 km do castro da Atalaia.

As obras que recentemente a empresa pública XESTUR realizou para o Concello de Cervo sacaron á luz unha importante cantidade de cerámica castrexa situada no perfil leste do outeiro deste posible castro.

A abundante presenza de fragmentos cerámicos castrexos alertounos de que estabamos perante un novo xacemento arqueolóxico. Ao percorrer o perímetro do posible castro, puidemos comprobar que no lado oeste había uns parapetos, sistemas defensivos tipicamente castrexos.

Lamentablemente, a ampliación do polígono industrial destruíu case totalmente estes parapetos e o recinto que albergaban. A destrución puido afectar arredor duns 4000m2.

Segundo podemos observar en fotografías aéreas, a zona destruída podería tratarse do antecastro.

Estes feitos constitúen unha nova agresión, ocasionada por unha empresa pública, ao patrimonio arqueolóxico. Suponse que unha obra destas características debería contar cun estudo de impacto medioambiental, que neste caso ou non se fixo ou se fixo mal.

Pódense ver imaxes aquí:

http://picasaweb.google.es/mr.patrimonio/CASTRODOCOIDO#

Pagou a pena ir a Rinlo

2010-05-25T13:33:00.000-07:00

...en todos os sentidos. O estupendo día meteorolóxico resultou plenamente consecuente co resultado e aproveitamento da visita que máis de 30 persoas poidemos atopar o pasado domingo. A xornada comezou cunha breve e interesante exposición verbal e gráfica de Carlota Eirós, a nosa guía para coñecer esta localidade tan especial da Mariña, sobre os restos de cetáreas que se poden atopar na costa galega desde A Guarda ata Ribadeo, coas diferentes tipoloxías de cada zona e outras curiosidades e datos de interese.
A continuación comezamos o percorrido polas tres cetáreas que se conservan en Rinlo, en diferente estado de conservación pero as tres moi importantes pola súa dimensión e polas especiais características derivadas da súa adaptación a esta costa. Seguimos o paseo polo núcleo de Rinlo, en particular pola parte máis antiga, de orixe medieval e con interesantes observacións que nos permitiron coñecer algúns rasgos tipolóxicos das construcións e das estreitas rúas ou congostras, perfectamente organizadas para a función que cumpriron ao longo dos séculos no contexto dunha poboación que practicaba unha economía mixta agraria e mariñeira.
A xornada rematou arredor dun arroz caldoso de lumbrigante que nos acabou de deixar un inmellorable sabor de boca.

Pódense ver imaxes aquí:

http://picasaweb.google.es/mr.patrimonio/PASEOPORRINLOAROTADASCETAREAS23DeMaio2010?feat=email#

Nova actividade de MariñaPatrimonio

2010-05-15T06:31:00.000-07:00

PASEO POR RINLO.

A ROTA DAS CETÁREAS

Domingo, 23 de maio

11 da mañá

Antiga Escola de Rinlo

A visita será guíada pola arquitecta Carlota Eiros* , que fará unha intervención previa á visita por Rinlo e ás antigas cetáreas.
É conveniente inscribirse utilizando o noso enderezo de correo electrónico:

mr.patrimonio@gmail.com

*Carlota Eiros García
(Meira, 1962). Arquitecta. Estudos nas universidades de Barcelona e A Coruña. De 1989 a 1996 residiu en Inglaterra, onde se especializou en Restauración histórica na Oxford Brookes University. En 1998 publicou A Casa Grande do Século XIX. No 2000 concluíu o Rexistro e Catalogación das Casas Grandes da Terra Cha. Unha das súas obras como arquitecta foi incluída entre as 25 mellores casas modernas de Galiza descritas en 25 Galician Houses (Ed. Espontáneas, 2005). Actualmente anda a traballar na restauración arqueolóxica do barrio de orixe medieval da Ribeira de Rinlo (Ribadeo)

Visita a San Martiño

2010-05-10T12:47:00.000-07:00

O domingo 9 de maio Mariñapatrimonio achegouse a San Martiño para facer, como estaba prevista, a visita guiada ás pinturas murais desta xoia do noso patrimonio.
Foron moitas máis das persoas que inicialmente se tiñan inscrito nesta actividade as que se deron cita no adro da igrexa ás 12:30 horas.
Despois das palabras de benvida aos asistentes pronunciadas polo noso presidente que lembrou as actividades que está a desenvolver ou que proxecta a Asociación
( exposición itinerante sobre a industria do ferro, iniciativas arredor da defensa do Castro da Atalaia, Paseo por Rinlo…), presentou ao Presidente da asociación focega A Pomba do Arco, Xoán Ramón Fernández Pacios que colaborou con Mariñapatrimonio na convocatoria deste acto.
Xoán Ramón, historiador e autor, entre outros, do libro “San Gonzalo bispo mindoniense” fixo unha fermosa intervención que, polo seu interese, reproducimos:
“…Hoxe estamos aquí, en San Martiño, para saber un pouco máis da historia deste monumento, desta xoia do románico galego, desta basílica aínda que a min, persoalmente me gusta chamala a antiga catedral. Os muros que me rodean son obra de dous bispos, dende a porta ata o cruceiro son obra do bispo do Munio, que chegado de Santiago estivo case todo o seu bispado ao lado do rei Afonso VII e polo tanto lonxe destas terras e as ábsidas son obra de Gonzalo Fróilaz, o Bispo Santo que temos soterrado nese sinxelo sartego, home de pobo e amado polo seu pobo. Hoxe moitos de vos acompañaredes a súa imaxe ata a súa capela. Levaredes a súa imaxe porque somos un pobo agradecido que lembra a aquel bispo que loitou contra tódolos poderes do momento para salvar o que máis quería, San Martiño. Só a súa morte puido frear o seu labor e pensade, hoxe, cando o acompañedes, que neste ano do 2010 cúmprense mil anos da morte deste bispo que tanto quixemos e ao que o pobo canonizou.
Pero, San Martiño de Mondoñedo é moito máis que o bispo Gonzalo, son as tumbas con escritura súevica aparecidas nas escavacións de Chamoso Lamas e que nos conectan co Reino Suevo de Galiza e, posteriormente, con aquel famoso Mosteiro Máximo, sede principal do bispado dos bretóns, co seu bispo Maeloc á cabeza. Pero San Martiño é moito máis, é Sabarico II e San Rosendo é a cultura do século X, que paseou por estas rúas, que viviu e xurdiu dentro destes muros. E San Martiño é, tamén, pinturas. Perdimos as do milagre de San Gonzalo, das que só conservamos unhas letras pero recuperamos unhas novas, que deben situar a San Martiño no lugar que debe ocupar.
Estimamos que para falar destas pinturas só o podía facer a persoa responsable do seu achádego e da súa restauración, é dicir, Branca Besteiro.
Branca é Licenciada en Belas Artas pola Facultade de Belas Artes de San Fernándo, da Universidade Complutense de Madrid na Especialidade de Restauración en Policromía sobre tela, madeira, mural e grabado.
O seu curriculo é impresionante aparte de extenso, agardo que me permita resumilo destacando tan só a súa faceta de restauradora en pinturas murais. Se empezo a falar dos retábulos, imaxinería en madeira e bronce que ten esta muller restaurado, tanto en Galiza como no estado español, lémbrome agora das túas restauración sen Madrid e Salamanca, non remataría ata despois de comer. De aí que só vaia falar do seu traballo entorno a pintura mural e circunscribindoo territorialmente a Galiza .
Branca foi a responsable, entre outras cousas, da restauración de pinturas murais en Bóveda, en Lugo, Paradela, San Pedro de Rocas (Ourense), Meira, Portomarín, no mosteiro de Samos, no Incio, en Santiago de Compostela, San Vicente de Pombeiro, Santa María de Mañón, Cebreiro, Melide, Santa María de Mosteiro, Castroverde, Friol, Viveiro e San Martiño de Mondoñedo. Debo dicirvos que me quedan máis nomes de lugares no tinteiro que os que saquei aquí. Tendo en conta a súa experiencia dilatada pensamos que debía ser ela a que nos amosase o proceso de restauración das pinturas e nos explicase o seu significado e cronoloxía…”
De seguido a restauradora Branca Besteiro fixo un completo resume do seu traballo na igrexa de San Martiño, explicando a técnica de execución da pintura mural románica, utilizando como apoio as imaxes proxectadas nunha pantalla que nos serviu , ao nutrido grupo que seguía esta visita guiada , para comprobar o estado no que se atopaban as pinturas antes da restauración e para nos decatar da importancia desta intervención que descubre o ciclo pictórico de San Martín de Mondoñedo.
Por certo, como ao rematar a visita foron varias as persoas que se interesaron polos traballos publicados sobre esta magnífica restauración, facilitámoslles desde aquí os seguintes enderezos de Internet:

http://www.amigosdelromanico.org/revistaromanico.html

http://www.arteguias.com/revistaromanico.htm

Tamén Branca Besteiro ten publicado no nº 25 da Revista de Estudos Mindonienses un interesante artigo titulado “ As pinturas murais de S. Martiño de Mondoñedo”

Podes ver as fotos da visita aquí:
http://picasaweb.google.es/lh/sredir?uname=mr.patrimonio&target=PHOTO&id=5469327276357628018&aid=5469327116415319841&authkey=Gv1sRgCIX419i51bXLYw&feat=email

Próxima visita guiada a San Martiño

2010-04-30T01:01:00.001-07:00

Domingo 9 de maio, ás 12:30 horas da mañá.

Esta visita estará guiada pola restauradora Branca Besteiro que fará un percorrido pola historia das pinturas contando co apoio dunha proxección que se realizará na propia igrexia. Esta actividade está organizada en colaboración coa asociación A Pomba do Arco, de Foz e conta co apoio das asociacións veciñais do concello.

A Pontenova acolle a Exposición sobre o ferro

2010-04-28T14:07:00.000-07:00

O Museo do Salmón na localidade de A Pontenova acolle desde onte día 27 de abril e até o día 8 de maio a exposición itinerante arredor da Industria do Ferro que Mariñapatrimonio ten a disposición de institucións e asociacións da comarca.

A exposición, que leva por título “ A industria do ferro no norte de Lugo e no occidente astur”, recolle a orixe e a evolución histórica do traballo do ferro nesta zona, os lugares de extracción e traballo ( explotacións mineiras, ferrarías, mazos e forxas), a elaboración de obxectos de corte e tres lugares sobranceiros na dedicación á manufactura de obxectos de ferro: A Pontenova, Riotorto e Taramundi.

Esta mostra pode ser visitada todos os días en horario de 11 a 20 horas.

A exposición itinerante sobre a industria do ferro chega a Riotorto

2010-04-17T12:57:00.000-07:00

A exposición itinerante, realizada pola Asociación Mariñapatrimonio, sobre a industria do ferro chega a Riotorto onde vai estar aberta na Casa da Cultura deste concello até o día 23 de abril.

A mostra, que leva por título “ A industria do ferro no norte de Lugo e no occidente astur”, recolle a orixe e a evolución histórica do traballo do ferro nesta zona, os lugares de extracción e traballo (explotacións mineiras, ferrarías, mazos e forxas), a elaboración de obxectos de corte e tres lugares sobranceiros na dedicación á manufactura de obxectos de ferro: A Pontenova, Riotorto e Taramundi.

A exposición estará aberta aos visitantes de 9:30 a 14 horas e de 16:30 ás 20 horas na localidade de Riotorto que este domingo celebra a cuarta edición da Feira da Artesanía do Ferro.

Cazando elefantes en San Cibrao

2010-04-02T05:03:00.000-07:00

Publicamos esta interesante reportaxe feita polo xornal EL PAÍS sobre os útiles do paleolítico do río Covo.

EL PAÍS
SILVIA R. PONTEVEDRA - Santiago - 28/03/2010
Cecilia paseaba hai uns días pola beira do río Covo cando descubriu entre os coios redondos unha pedra grande e afiada que se parecía aos útiles primitivos de sílex que vira nalgunha ocasión. A muller, veciña dunha urbanización que se chama como o río, en San Cibrao (Cervo), non o dubidou demasiado. Avisou axiña a un membro de MariñaPatrimonio, unha agrupación cultural que naceu para defender o castro da Atalaia, precisamente na desembocadura do Covo, dunha tropelía urbanística con licenza municipal. O colectivo localizou entón entre os pelouros outras sete pezas de similares características e informou á Xunta, que o luns pasado mandou ao lugar a un arqueólogo. Era certo. Aquelas pedras foran talladas por unha man humana, ou máis ben homínida, e non eran oito, senón 12. Unha ducia de utensilios pesados, pouco manexables pero tan prácticos para os seus donos como unha navalla suíza con motoserra, que poderían ter unha antigüidade de entre 300.000 e 100.000 anos.

As dúbidas, a partir de agora, iranse despexando no museo de Prehistoria e Arqueoloxía de Vilalba, onde o xoves quedaron depositados estes apeiros primitivos para a súa custodia e investigación. "Temos 12 pedras e unha chea de incógnitas", recoñece o director do museo, Eduardo Ramil. Os utensilios, raedeiras, fendedores e bifaces, atopáronse nunha das chamadas terrazas fluviais de Cervo, terreos chairos abundantes en cantos rodados e terra moi fértil grazas aos sedimentos dos ríos que ao longo de miles de anos modificaron as súas canles polo val deixando ao aire campos de cultivo.

"Os veciños, para poder traballalas, foron apartando para as beiras os cantos", explica Manuel Miranda, integrante de MariñaPatrimonio. Nunha desas moreas apareceron os útiles paleolíticos. Pero agora, segundo Ramil, haberá que tentar saber se sempre estiveron aí (porque nese lugar tan cheo de pedras atopaban a materia prima para as súas armas e alí mesmo tallábanas) ou se chegaron arrastrados pola corrente, nun período da historia no que se produciron cambios radicais na paisaxe.

O que parece que está claro é que o ser que tallou esas pedras era o Homo heidelbergensis, probable sucesor do Homo antecesor e tataratataravó do neandertal. Un homínido de face aínda moi simiesca, pero alto (1,75-1,80 metros de estatura) e robusto (uns 100 quilos, os machos adultos). Cun cerebro de capacidade semellante ao do home actual, dentes pequenos, nariz chato con grandes orificios e nada de queixelo. E intelixencia e pericia suficiente para acender un lume, para comunicarse coa voz, para sentir vínculos familiares, apiadarse do próximo e inventar formas de facer música recorrendo a instrumentos como as estalactitas. Non vivían máis aló de 40 anos, e a esta idade chegaban, xa desdentados, grazas á solidariedade dos mozos, que logo lles daban, á súa maneira, sepultura.

En Atapuerca apareceron máis ósos de heidelbergensis que en ningún outro lugar do mundo. Con todo, o primeiro dos restos deste homínido, unha mandíbula inferior, descubriuno un traballador dunha mina de Mauer, en Heidelberg (Alemaña), en 1908.

Ramil explica que se dedicaban "a colleitar, a cazar e a alimentarse da carroña". Movíanse fuxindo do frío, e buscando manadas de animais, auga e pedras coas que fabricar os seus utensilios, aínda que tamén chegaron a tallar madeira e óso. Se tiñan o que necesitaban, non cambiaban o lugar no que estaban asentados, e moitas veces recorrían á "caza de descoido". Vían un animal grande e enfermo e seguíano ata que morría. Entón abríano e esnaquizaban cos seus bifaces, unhas pedras grandes, afiadas polas dúas caras, de forma simétrica, que tiñan que agarrar coas dúas mans. "O peso da pedra axudaba a cortar tanto como a punta", e a ferramenta multiusos valía o mesmo para cortar a carne que para partir un tronco de carballo, que xa os había entón en Galicia. Con todo, entre as árbores, ademais de osos e cervos grandes movíanse os rinocerontes e os elefantes. Coas súas pedras talladas aqueles homes primitivos "sacaban os ósos" xigantes e comían a medula", o mellor dos manxares.

Novo xacemento arqueolóxico do paleolítico inferior en Cervo

2010-03-22T14:07:00.000-07:00

MariñaPatrimonio informa ao Servizo de Patrimonio Cultural da Consellería de Cultura do lugar no que se atopa un novo xacemento arqueolóxico do Paleolítico inferior.

A semana pasada MariñaPatrimonio púxose en contacto con Patrimonio para informar sobre o achado casual duns útiles líticos nunha terraza fluvial do río Covo, río que desemboca en San Cibrao (Cervo).
Na xornada de hoxe o arqueólogo da Consellería de Cultura, acompañado por membros de MariñaPatrimonio, achegouse ao lugar para recadar información sobre a zona e recolleu 12 útiles líticos, entre os que se atopan raedeiras, fendedores e bifaces. Este tipo de útiles líticos, que poden ter unha antigüidade de 300.000 anos, son o testemuño máis antigo de presenza humana na Mariña.
Co achado deste novo xacemento, confírmase unha vez máis a enorme riqueza arqueolóxica e patrimonial do concello de Cervo.

Pincha aquí para ver as imaxes dos achados:

http://picasaweb.google.es/lh/sredir?uname=mr.patrimonio&target=ALBUM&id=5450837718422816305&authkey=Gv1sRgCJKt293K_I2JMQ&feat=email

Presentación Modelo Burela

2010-03-22T14:02:00.000-07:00

Mariñapatrimonio
convídao
á presentación do vídeo
Modelo Burela
*
Intervirán:
Matías Nicieza ( director do documental )
Bernardo Penabade ( Profesor )
Dores Santos ( Protagonista )
*
Xoves día 25 de marzo
20:30 horas
Salón de Actos de CaixaGalicia
Viveiro

MariñaPatrimonio apoia que o legado de Álvaro Gil siga no Museo Provincial de Lugo

2010-03-13T06:02:00.000-08:00

O legado de Álvaro Gil Varela conta cun considerable número de pezas de ourivería castrexa procedentes da Mariña:
Brazalete ou torques de Riotorto.
Torques do Cu de Castro. Marzán. Foz
Fragmentos de dous torques de Viveiro.
Dúas arracadas e fragmentos de dous torques do castro do Masma. Mondoñedo
Dous Torques de ouro e un Torques de prata do Coto da Recadieira. Mondoñedo
Torques e a arracada de Burela
Con independencia de que a súa titularidade sexa pública ou privada, entendemos que o legado de Álvaro Gil Varela é un ben público que forma parte do patrimonio de todos e todas as galegas.
Este legado debe quedar subordinado á posibilidade do gozo público e debe pasar a xeracións posteriores nas mellores condicións de conservación e sen disgregacións que poidan perturbar a súa contextualización histórica.
MariñaPatrimonio entende que isto só se pode garantir permanecendo nunha institución pública, como é o caso do Museo Provincial de Lugo.

Apoio a Pepe “El Ferreiro”

2010-02-18T06:18:00.000-08:00

Dende a asociación sociocultural MariñaPatrimonio queremos facer público o noso apoio e o noso recoñecemento a José Naveiras Escanlar, Pepe “El Ferreiro”, destituído como director do Museo de Grandas de Salime.
Pepe é un defensor da cultura e do patrimonio da súa terra. Co esforzo e dedicación de toda unha vida creou o Museo de Grandas, considerado un dos mellores museos etnográficos de Europa .
O museo que ata agora dirixiu “El Ferreiro” é un dos máis visitados de Asturias e foi decisivo para o desenvolvemento turístico-cultural da zona, axudando a crear tecido social e conseguindo revitalizar a economía de toda a comarca.
MariñaPatrimonio quere tamén reprobar o cese caciquil e escandaloso de “Pepe el Ferreiro” como director do Museo de Grandas de Salime así como o intento de linchamento moral que está a sufrir e esixe a imediata readmisión no seu cargo de director.
Ferreiro, estamos contigo. Haxa salú.

Máis información sobre Pepe el Ferreiro
http://www.facebook.com/group.php?gid=279148793240
http://apoyoapepe.blogspot.com/

Viaxe a Exipto con LugoPatrimonio

2009-12-16T03:35:00.000-08:00

A nosa asociación amiga da capital provincial organiza para este inverno unha fantástica viaxe a Exipto, para a que se poden apuntar, ata o 22 de decembro, tanto asociados como non asociados.

Non esperedes a saber se vos toca o gordo de Nadal para contactar, que logo ao mellor non hai praza!

Podedes contactar no telefono 676 800 227
Remitimosvos á web de LugoPatrimonio para que vexades os detalles da viaxe, que non ten desperdicio:
http://www.lugopatrimonio.org/web/index.php?option=com_content&view=article&id=298:venteaexipto&catid=1:latest-news&Itemid=18

HISTORIAS SALGADAS

2009-12-05T01:40:00.000-08:00

POLAFÍA NO MUSEO PROVINCIAL DO MAR de SAN CIBRAO, CERVO

Sábado, 12 de decembro de 2009, ás 7 da tarde

Intervirán:
Antón Castro, Isidro Novo, Xoán Neira, Paco Rivas e veciñas e veciños de Cervo e arredores, para contar e contar, para conversar e escoitar

ENTRADA LIBRE

Organiza. AELG (Asociación de Escritores en Lingua Galega)
Patrocina: Área de Cultura da Deputación de Lugo.
Colaboran: Asociación MariñaPatrimonio
__________
As polafías son unha proxecto da Asociación de Escritores en Lingua Galega (AELG), coordinado polo Vogal de Literatura de Tradición Oral, Antonio Reigosa, que conta coa colaboración de diversas asociacións e institucións.
A palabra polafía é un neoloxismo referido ás reunións ou veladas de carácter festivo con contidos literarios e musicais, e ten como obxectivo primordial o de poñer en valor e rescatar do esquecemento o valioso patrimonio oral, literario e musical, galego. O termo polafía quere reunir no seu significado o mellor dos diferentes matices e acepcións de vellas palabras (polavilas, fías, fiadas, fiandóns, seráns,...) con semellantes contidos. A principal diferenza, en canto ao desenvolvemento, daquelas xuntanzas de antigo co desta nova proposta é que agora podemos, e debemos, axudarnos das novas tecnoloxías, desde os aparellos de gravación, que favorecen o arquivo e estudo do recompilado, ata o uso de novas tecnoloxías, caso de internet, que poden contribuír a unha ampla difusión deste patrimonio.
O formato das polafías require a presenza dun mantedor, divulgador ou especialista que introducirá e comentará as principais características das pezas e xéneros literarios amosados, dun recitador de poesía anónima ou de autor de feitío popular; dun músico, que interpretará romances, coplas ou cantares de raiceiras tradicionais. Sen embargo, o elemento humano transcendental e imprescindible no desenvolvemento de cada polafía constituírano os homes e mulleres, narradores, cantadores, romanceadores...etc, veciñas e veciños de cada lugar onde se desenvolva a polafía, pois eles son os auténticos protagonistas, os que xenerosamente transmiten o seu saber.
O que suceda nas polafías será gravado e logo difundido a través da web da AELG, na súa Sección de Literatura Oral. As polafías terán unha duración aproximada de arredor de 90 minutos.

Conferencia de Xoan Carmona en Viveiro

2009-12-03T11:44:00.001-08:00

Ante unha abundante concurrencia, no sede social de Caixa Galicia, o profesor universitario e especialista en arqueolóxía industrial, Xoan Carmona, realizou un ameno repaso por todos aqueles restos da industrialización na Mariña dos últimos 250 anos, desde toda a industria do ferro da comarca do Eo, de Sargadelos e Viveiro, ata a experiencia de industria mecánica desenvolvida por Barro en Chavín, e pasando polas primeiras instalacións hidroeléctricas ou da fabricación textil, resaltando a importancia que, cualitativamente, tivo a industria mariñana dentro do contexto galego e mesmo español.

Entre as interesantes ideas que transmitiu, compre destacar o feito de que non se acometera a necesaria planificación sobre os restos arqueolóxicos existentes no país, que permita optimizar os investimentos realizados, nada despreciables, pero inconexos e carentes de viabilidade e de proxección. A primeira prioridade, para Carmona, sería elaborar un inventario sistemático de bens, que permitiría rendabilizar os recursos investidos na posta en valor daqueles restos seleccionados como máis representativos e interesantes.

Finalmente, deixou tamén a máis optimista idea de constatar na sociedade galega un crecente interese pola valorización e defensa do noso patrimonio histórico-industrial, algo que nos debe animar a continuar na nosa tarefa de sinalar e por en evidencia os nosos bens patrimoniais.

Para ver máis fotos do evento:
http://picasaweb.google.es/lh/sredir?uname=mr.patrimonio&target=ALBUM&id=5407354350174908881&authkey=Gv1sRgCOTo6OPAlqjzxwE&feat=email

Continúan as Xornadas de Patrimonio en Viveiro

2009-11-23T13:10:00.000-08:00

Mércores, 2 de decembro, ás 8:30 da tarde

Salón de Actos de Caixa Galicia en Viveiro

terceira das actividades das XORNADAS DE PATRIMONIO

Conferencia a cargo do profesor da USC Xoán Carmona Badía:

O PATRIMONIO INDUSTRIAL NA MARIÑA LUGUESA

Pola ruta do ferro

2009-11-22T02:51:00.000-08:00

Na Praza dos Fornos, en A Pontenova, iniciamos o camiño que nos levou, o sábado 21 de novembro, pola rota do ferro. Miguel Abraira –o noso guía— explicounos ao pé dos fornos o percorrido que nos levaría á Ferraría de Bogo, ao mazo de Ferreiravella e á forxa de Manuel Alonso no lugar da Ermida xa no concello de Riotorto.

Pagou a pena achegarse até Bogo e baixar a pé até a Ferraría—hoxe absurdamente pechada—para ter ocasión de coñecer este complexo que xa funcionaba no 1534 e que foi mellorada no XVIII deixando de funcionar nese mesmo século por mor dun incendio. A instalación foi aberta nesta ocasión especial para Mariñapatrimonio grazas á xestión do Concello de A Pontenova que vai ser no futuro—agardamos que próximo—o responsabel do seu mantenemento.

O autobús achegounos despois ao concello de Riotorto onde o seu alcalde, Federico Gutierrez Estoa, nos facilitou a visita ao Mazo de Ferreiravella e Miguel Abraira e o ferreiro Manuel Alonso puxeron a funcionar o vello mazo.

A terceira das visitas foi un acertado remate para comprendermos todo o proceso. No obradoiro de Manuel Alonso pasamos un tempo inesquencíbel. Manuel fixo, para nós un coitelo na súa forxa. Alí lembramos o texto de Miguel Abraira cando, no seu conto que escrebiu para o Pregón da I Feira da Artesanía do Ferro, no 2007, dicía:
“E por eso—pensa meu pai—agora non deixo de preguntarme que che vou decir eu a ti, e quen vai a conservar agora toda esa beleza de xestos e palabras que temos que deixar no rego: malogreiro, ximela, tendal, gorreón, cepitillo, curvatoes,mainelo,vergallón…
E claro. Entón comprendo. Comprendo os centos de anos de memoria e de historia que perdo. Comprendo que quizais un día tamén nos toque a nós, e Riotorto quede sen ferreiros, e que igual o bonito é conservar precisamente o que os demais van deixando en desuso. Conservar e recordar, para que outros, os que veñan despois de nós, conozan, comprendan e poidan aprender a amar esta terra”.

Para ver as fotos da xornada pica neste enlace:
http://picasaweb.google.es/lh/sredir?uname=mr.patrimonio&target=ALBUM&id=5406656961955260401&authkey=Gv1sRgCPz534Ck5PToIw&feat=email

Pola rota do ferro

2009-11-10T13:00:00.000-08:00

Excursión polos concellos de A Pontenova e Riotorto
Sábado 21 de novembro de 2009

-A visita comenzará ás 10:30 horas na Praza dos fornos de A Pontenova.

-Visitaremos: os fornos de A Pontenova, a ferraría de Bogo, o mazo da Fraga ( en Ferreiravella, Riotorto ) e unha forxa en A Ermida ( tamén en Riotorto )

-14:30 horas: Fin da actividade. Xantar organizado ( optativo )

-Para chegar até A Pontenova, Mariñapatrimonio porá a disposición das persoas que participen un transporte colectivo que saíndo de Viveiro ( ás 9 da mañá ), pararía en distintos pontos de Xove, Cervo, Burela, A Espiñeira e Vilanova de Lourenzá para recoller ás persoas que previamente se inscriban nesta actividade.

-Inscrición: enviando os nome, enderezo, número de teléfono a mr.patrimonio@gmail.com

-Cuota de inscrición:
-asociados/as: gratuita
-non asociados: 5 €
-Prazas limitadas. A inscrición farase por orde de de anotación até completar as prazas.

-Data límite de inscrición: mércores 18 de novembro

Guía: Miguel Abraira, Premio Xesús Ferro Couselo, ( investigación de antropoloxía e ciencias sociais. Autor do traballo: Ferreiro: técnica e cultura. O traballo tradicional do ferro en Riotorto, A Pontenova e Taramundi.

2009-10-25T11:56:00.000-07:00

A Casa da Cultura do concello de A Pontenova foi o lugar escollido por Mariñapatrimonio para dar comezo ás Xornadas de arqueoloxía industrial. O conferenciante, Xavier R. Lombardero, traballador de La Voz de Galicia, foi presentado polo presidente da nosa asociación que fixo un breve percorrido pola biografía deste xornalista e emprazou aos asistentes a participar na seguinte das actividades deste ciclo: a visita guiada Pola ruta do ferro da que o investigador Miguel Abraira vai ser o condutor o sábado 21 de novembro.O conferenciante iniciou o seu relatorio facendo un percorrido histórico polas orixes da industria do ferro en A Pontenova. Esta localidade—dixo—medrou coa chegada de man de obra para as minas—máis de mil mineiros tiveron ocupación nesta industria—e aquí se xestaron as primeiras mobilizacións obreiras, unha manifestación de mulleres e tamén, ao abeiro deste movimento, naceron as organizacións agrarias nesta zona.
Xavier R. Lombardero referiuse á necesidade de recuperar o patrimonio, considerando que a primeira das obrigas para conseguir este obxectivo é ter en conta a historia. Tamén criticou o xornalista a desfeita urbanística da vila e a perda de edificios que falaban do pasado. Reclamou o nome de “Avenida dos mineiros” para o vial que hoxe hoxe ten o de “Estrada Xeral” e propuxo o de “Carreiro dos almorzos” para o camiño ata onde chegaban de cotío as mulleres dos mineiros para lles levar a comida.

A conferencia, seguida por moito público, e da que o xornal “La Voz de Galicia” publicou un avanzo, contribui sen dúbida a por en valor o noso patrimonio.

Arrancan na Pontenova as Xornadas arredor da industria do ferro

2009-10-19T14:55:00.000-07:00

MariñaPatrimonio abre na Pontenova as Xornadas sobre Arqueoloxía Industrial

2009-10-17T14:13:00.000-07:00

O xornalista Xavier R. Lombardero será o primeiro dos conferenciantes do ciclo dedicado á industria do ferro que organiza a asociación Mariñapatrimonio. As Xornadas de Patrimonio centradas na arqueoloxía industrial na Mariña Luguesa darán comenzo o vindeiro sábado 24 de outubro , ás sete e media da tarde, na Casa da Cultura do concello de A Pontenova. Repensando A Ponte será o título do relatorio do xornalista Xavier R. Lombardero.

A segunda das actividades deste ciclo será unha visita guiada por Miguel Abraira que percorrerá os concellos de A Pontenova e Riotorto. A excursión, Pola ruta do Ferro ,partirá desde o Museo do Mar de San Cibrao o día 21 de novembro, ás 10 da mañá e os participantes visitarán a Ferraría de Bogo, o Mazo de Ferreiravella, un obradoiro tradicional e distintos pontos de interese dos dous concellos. As persoas interesadas nesta actividade deben porse en contacto coa asociación organizadora para a reserva de prazas.

Xoán Carmona Badía, intervirána terceira das actividades deste ciclo, nun acto que se desenvolverá en Viveiro no mes de decembro, para falar arredor do patrimonio industrial, das pegadas materiais da actividade humana máis recente na Mariña Luguesa.

Tamén Mariñapatrimonio porá a disposición dos centros de ensino da comarca unha exposición itinerante sobre o pasado industrial da Mariña Luguesa.

Na presentación desta actividade participaron Francisco Luís Rodríguez Guerreiro e Manuel Miranda da asociación organizadora e Antonio Veiga Outeiro, deputado responsábel da Área de Cultura da Deputación de Lugo xa que estas Xornadas de Patrimonio contan co patrocinio da área de Cultura da Deputación de Lugo . Tamén colaboran os concellos de Riotorto e A Pontenova.

De lingua enxalzada a lingua mortificada

2009-10-16T12:15:00.000-07:00

Xosé Ramón Freixeiro Mato, profesor na Facultade de Filoloxía da Universidade da Coruña, demostrou onte en Burela, ao traveso dun detallado percorrido histórico, como foi evolucionando a valoración do galego fóra e dentro, en paralelo coa propia evolución histórica de Galiza, que pasou de ser o centro do reinos cristiáns nos séculos centrais da Idade Media, a ser esquecida e deliberadamente excluída a medida que o Reino de Castela foi facéndose hexemónico na Península e impoñendo o seu idioma, o castelán.

Freixeiro Mato sostivo e demostrou documentalmente como, desde o s. XV en diante, os galegos e a súa lingua, noutrora usada polas elites políticas e culturais mesmo casteláns, foi sometida a un prolongado e sistemático proceso de deturpación xenófoba que aínda agroma nestes tempos actuais, pretendendo que o galego, a lingua propia dos galegos e galegas, quede reducido ao papel de lingua secundaria ou residual no seu propio ámbito natural.

Rematou a súa brillante intervención lembrando os últimos datos publicados pola Real Academia Galega sobre uso da lingua, que sofre un preocupante descenso, precisamente nos sectores sociais máis dinámicos: a poboación urbana e sobre todo a mocidade, e afirmou que só unha contundente reacción da sociedade galega reclamando os seus dereitos lingüísticos pode frear esta ofensiva contra a noso maior ben patrimonial e identitario.

MariñaPatrimonio participa na Plataforma QUEREMOS GALEGO!

2009-10-10T11:12:00.000-07:00

Dentro da campaña de mobilización en defensa do noso máis importante ben patrimonial, a lingua, MariñaPatrimonio organiza

o seguinte acto:

Conferencia a cargo de Xosé Ramón Freixeiro Mato, titulada:

“A HISTORIA E A DIGNIDADE DO GALEGO. DE LINGUA
ENXALZADA A LINGUA MORTIFICADA”

XOVES, DÍA 15 DE OUTUBRO

Salón de Conferencias de Burela (Biblioteca vella), ás 20:30 horas

Excepcional achado no Castro da Atalaia

2009-10-06T13:36:00.000-07:00

No último número da revista GALLAECIA, publicación do Departamento de Historia Universidade de Santiago de Compostela, dáse conta do achado dunha importante peza atopada no transcurso das escavacións arqueolóxicas levadas a cabo o ano pasado no Castro da Atalaia de San Cibrao
Esta excepcional peza arqueolóxica é un machado votivo con escena de sacrificio e cabeza de carneiro.
Bronces votivos aparecen en boa parte de Europa pero son moi escasos en Galiza. Só se coñecen dous: un deles é o machado votivo con cabeza de touro de Cariño, que se atopa no museo arqueolóxico de A Coruña.
O machado votivo do Castro da Atalaia é o único de Galiza aparecido no transcurso dunha escavación arqueolóxica co que aportará datos de gran interese para o estudo destes bronces votivos.
Esta peza vén a confirmar e a aumentar a importancia e a excepcionalidade do Castro da Atalaia que, como todos sabemos, está ameazado por Residencial Faro de San Ciprian de Promociones San Ciprian que pretende destruír este xacemento para construír pisos para veraneantes.
É un dereito de todos coñecer o que se leva atopado na Atalaia, tanto en estruturas coma en materiais, e saber a importancia que teñen.
Por este motivo, pedirémoslle á Dirección Xeral de Patrimonio que faga públicos os informes arqueolóxicos do Castro da Atalaia.

II Xornadas de Literatura de tradición oral da Deputación de Lugo

2009-10-02T13:38:00.000-07:00

O MITO QUE FASCINA: DO LOBO AO LOBISHOME

PROGRAMA:

VENRES 16 DE OUTUBRO
• 17:00 h · Acto de inauguración, coa participación de Xosé Antón Bao, Vicepresidente primeiro da Deputación de Lugo, e Cesáreo Sánchez Iglesias, Presidente da AELG
• 17:10 h · “Que vén o lobo!”, por Xabier P. Docampo
• 18:10 h · “O personaxe do lobo na tradición vasca. De animal totémico a animal maldito”, por Antxon Gómez Lorente
• 19:10-20:00 h · Mesa redonda: “O lobo, o mito que fascina”

PARTICIPAN: Xabier P. Docampo e Antxon Gómez Lorente ·
MODERA: Antonio Reigosa

SÁBADO 17 DE OUTUBRO
• 10:30 h · “Espazos lupinos de Galicia. Os foxos do lobo”, por Alberte Reboreda
• 11:30 h · “Unha inquietante presenza: lobos e lobishomes no imaxinario galego e universal”, por X. Luís Garrosa Gude
• 12:30-13:30 h · Mesa redonda: “Do lobo ao lobishome”

PARTICIPAN: Alberte Reboreda e X. Luís Garrosa Gude
MODERA: Isidro Novo

COORDINADORES DAS XORNADAS
Isidro Novo e Antonio Reigosa

Entrada de balde

Diploma de asistencia. Se está interesado/a en obter diploma acreditativo da súa asistencia debe inscribirse previamente a través do e-mail oficina@aelg.org ou chamando ao tlf. 981 133 233
Exposición. “O lobo, unha carreira por sobrevivir”, na Sala de Exposicións do Pazo de San Marcos (sede da Deputación de Lugo), desde o 8 ao 25 de outubro de 2009.

Organizan: ADEGA, AAAGP, ERVA e Museo Provincial de Lugo.
Patrocina: Área de Cultura da Deputación de Lugo, Vicepresidencia primeira
Visitas guiadas para grupos escolares de E. Primario e ESO, con concertación previa no tlf. 659 683 384 / expolobo@gmail.com

MariñaPatrimonio denuncia o traslado de restos arqueolóxicos do Castro da Atalaia

2009-08-12T14:00:00.000-07:00

MariñaPatrimonio denunciou perante SEPRONA e da Dirección Xeral do Patrimonio o traslado, presuntamente ilegal, de materiais arqueolóxicos mesturados con area procedentes da destrución que Promociones San Ciprián provocou en decembro de 2007 no xacemento arqueolóxico inventariado do castro de San Cibrao. Estes materiais, que permanecían nunha finca fronte á gasolineira de Cervo, están sendo trasladados ao polígono industrial de Foz, incumprindo o que determina a lei para a remoción de terras con restos arqueolóxicos.

Trátase da acumulación duns 50 camións de restos que posteriormente foron tapados con terra doutra procedencia. ADEGA rescatou deste depósito, nunha simple inspeción superficial, dous muíños e restos de cerámica, denunciando estes feitos a 16 de xaneiro de 2008.

A pesar de que estes feitos foron denunciados hai case dous anos e que a D.X. do Patrimonio coñecía a existencia deste depósito con materiais arqueolóxicos, non se fixo ningunha intervención nel nin se procedeu á súa protección.

A Lei 8/1995 do 30 de outubro do Patrimonio Cultural de Galicia, no seu artigo 56.3 determina o control por un arqueólogo das remocións de terras que afecten ou poidan afectar un espazo onde se presuma a existencia de restos arqueolóxicos. Neste caso non se trata dunha presunción, senón que a aparición de dous muíños e de cerámica confirman a existencia de restos arqueolóxicos.

Este traslado crea un novo xacemento arqueolóxico no polígono industrial de Foz, falseando a historia e provocando, deste xeito, problemas no estudo arqueolóxico da Mariña.

MariñaPatrimonio solicita nas súas denuncias a inmediata paralización do traslado dos materiais e a paralización das obras no polígono industrial de Foz mentras non se comprobe se nos materiais acumulados procedentes de Cervo hai restos arqueolóxicos. Tamén solicita a intervención arqueolóxica nestes restos co obxecto de recuperar os materiais arqueolóxicos procedentes do xacemento inventariado do castro da Atalaia.

Remata o ciclo de literatura oral no castelo de Pardo de Cela

2009-07-10T16:08:00.000-07:00

Coa intervención de Isaac Ferreira, arredor da mitoloxía feminina presente no Valadouro -vellas, ninfas, xigantas- e de Manuel Lourenzo, que falou dos demos e santos, as sempiternas forzas do ben e do mal, que viven nesta terra.
Un fermosa e distendida exposición de dous homes que constitúen dúas das patas -non puido estar Xesús Pisón-da tríade cultural do Valadouro, patrimonio humano e intelectual de valor incalculable para a comarca.

Pódense ver fotos do evento aquí:
http://picasaweb.google.es/lh/sredir?uname=mr.patrimonio&target=ALBUM&id=5356948702624630017&authkey=Gv1sRgCMyj_urm8qWxHA&invite=CKfCx5QH&feat=email

Pechamos no Valadouro o ciclo de literatura oral

2009-07-07T09:25:00.000-07:00

O PATRIMONIO INMATERIAL: A LITERATURA ORAL
Polo País do Valadouro:xigantas, mouras, ninfas, demos e santos
a cargo dos escritores
Isaac Ferreira e Manuel Lourenzo
no Salón de Actos do
Castelo do Castro (ALFOZ)
VENRES día 10 de xullo, ás 20 horas

Galego. Patrimonio da humanidade

2009-07-04T14:40:00.000-07:00

Esta é a iniciativa cidadá que se promove desde o blog de Manolo Bragado, Brétemas, a partir dun manifesto que se pode ler e asinar se pinchades no seguinte enlace:

http://galegopatrimoniodahumanidade.blogaliza.org/2009/07/02/galego-patrimonio-da-humanidade/

Enlatamos a Mini e Mero...

2009-07-03T15:36:00.000-07:00

...para conservalos, claro. Dúas horas de verbo e música en directo que Mini e Mero nos brindaron no Conservatorio de Viveiro o pasado 12 de xuño, na primeira das xornadas sobre a tradición oral.

Dúas horas que souberon a pouco e que quedaron gravadas grazas ao amigo Nestor, de Viveiro e que dosificamos aqui en 12 clips de arredor de 10 minutos.

1/12: Presentación

2/12: A pedagoxía do aloumiño

3/12: A nosa historia

4/12: O alalá

5/12: Cantos de berce

6/12: Relixiosidade popular

7/12: A foliada

8/12: A muiñeira

9/12: Ritmos chegados de fóra

10/12: A transmisión da cultura popular

11/12: Cantos de cego

12/12: A caída de Manuel Ponte

Interesante actividade de Lugo Patrimonio na Mariña

2009-06-27T14:49:00.000-07:00

Para quen poida estar interesado/a en participar, facémonos eco da actividade que Lugo Patrimonio promove na costa de Ribadeo. Transcribimos aquí, co seu permiso o texto que anuncia na súa web esta iniciativa:

O día 4 de xullo faremos outra viaxe que nos introducirá na visión real do que está a pasar coa nosa Costa, os proxectos que a destrúen, e a riqueza que posúe e que seguramente descoñecemos. Da man da arquitecta Carlota Eiros, faremos percorridos en lancha, autobús e a pé, para visitar os seguintes lugares:

Ría de Ribadeo (en lancha, con inicio ás 10,30 h.).
Castro das Grovas.
Paseo polo núcleo de Rinlo.
Xantar (arroz caldoso con lumbrigante, como é de rigor).
Paseo deica as cetarias de Rinlo.
Castro de Meirengos.
Praia das Catedrais e arredores.
Casa-museo do pintor Celso Dourado, co seu fermoso xardín zen.
Percorrido final pola Costa (estragos urbanísticos e paseos).

Despois desta fermosa viaxe faremos as conclusións de rigor.

Notas
Saída de lugo, o 4 de xullo, sábado, ás 8,30 h. do lugar de sempre.
Regresaremos á nosa cidade arredor das 22 h.
Prazas limitadas a 35 coas condicións habituais.
Anotacións: día 29 de xuño, luns, na galería Sargadelos de Lugo, entre 18 e 20 h.

Lugo, xuño do 2009 A Xunta Directiva.

Engadimos enlace á web de MariñaPatrimonio:
http://www.lugopatrimonio.org/web/index.php?option=com_content&view=article&id=250:viaxearinlo&catid=1:latest-news&Itemid=18

3ª xornada de literatura oral, magnífica

2009-06-27T06:25:00.001-07:00

Nun espazo acolledor é arrodeados de estímulos lúdicos -a Libraría Bahía- desenvolveuse onte en Foz o terceiro dos encontros en torno á literatura oral, coa presenza inestimable de Antonio Reigosa, que moi preocupado por non fartar ao público, deixounos un exquisito sabor de boca coa súa intervención informal e mesmo humorística, pero tremendamente rica e rigorosa. Uns bocados de memoria mítica, máxica e fresca, sabiamente adobados coa empatía necesaria para engaiolar á audiencia.

Pica aquí para ver imaxes:
http://picasaweb.google.es/lh/sredir?uname=mr.patrimonio&target=ALBUM&id=5351792993819735137&authkey=Gv1sRgCI6wnuf5mbqWcg&feat=email

Este venres en Foz

2009-06-23T12:38:00.000-07:00

Conferencia
Mitos e monstros da Mariña
a cargo do escritor
Antonio Reigosa*

Libraría Bahia de FOZ
VENRES día 26 de xuño, ás 20 horas

* AUTOBIOGRAFÍA
Nacín en Zoñán, Mondoñedo, o 15 de agosto de 1958. Alí, sendo neno, tratei cos mouros do castro veciño, aprendín a coñecer os encantos que sementaban a néboa no curuto da Pena da Roca e, anque nunca o conseguín, intentei moitas veces botar a rolos polo mundo abaixo unha grande rocha que se mantén en extraño equilibrio chamada Pena Morcán. Destas e doutras experiencias da miña infancia venme, creo eu, a miña querencia pola fantasía popular. Traballo no Departamento de Didáctica do Museo Provincial de Lugo desde 1982. Son escritor, conferenciante, investigador da mitoloxía e da literatura oral galega, colaboro con traballos de divulgación relacionados coa historia, a arte, a etnografía, a mitoloxía popular e a literatura oral en diversos medios de comunicación e revistas especializadas. Son cofundador de "Chaira", Grupo de Investigación Etnográfica (Lugo 1992), do que tamén forman parte Ofelia Carnero, Mercedes Salvador e Xoán R. Cuba, xuntos levamos adiante varias campañas de recollida en distintos concellos da provincia de Lugo. Ponente en numerosas xornadas e congresos, participo en campañas de promoción da lectura nos centros de ensino, bibliotecas e asociacións culturais. Creador e coordinador de contidos da Enciclopedia Virtual da Fantasía popular de Galicia denominada Galicia Encantada. Coordinador da revista oral de periodicidade trimestral O pazo das musas, editada polo Museo Provincial de Lugo desde 2004. Das obras que se relacionan no apartado correspondente, unha boa parte escribinas en colaboración con Xoán Ramiro Cuba e con Xosé Miranda. Recibín, entre outros, os seguintes premios: Certame Nacional de Artes e Tradicións populares do Ministerio de Cultura (1987), o Facho (1989), o Premio Merlín, (1998 ), Premio Supernova (1999), Premio Raíña Lupa,(2000), Lucense do Ano (2002), Premio Frei Martín Sarmiento (2005); e fun finalista do Premio Nacional de Literatura Infantil o ano 1999 con "Memorias dun raposo", e do Premio Pura e Dora Vázquez de Creación Literaria o ano 2004 con "Pesadelos".

Contos, mitos e lendas na Casa das Letras de Ribadeo

2009-06-20T12:23:00.001-07:00

Na Casa das Letras de Ribadeo no ciclo arredor da Literatura Oral, o escritor e estudioso da narrativa popular, Xosé Miranda, ilustrounos cun didáctico relatorio no que, baixo o título “Guía da narrativa oral”, foi debullando as diferenzas nos xéneros da literatura de tradición oral: o conto, a lenda e o mito. Explicou a tendencia dos folcloristas a mesturar as lendas cos mitos e as dificultades para diferencialas.
Ao longo dunha amena exposición, salferida de exemplos ilustrativos recollidos da rica tradición oral, o autor amosou a relación da nosa literatura coa doutras culturas; a evolución dos mitos nas “Lendas urbanas” e nos actuais” Mitos científicos”; tamén reivindicou o recoñecemento da existencia dunha mitoloxía galega e, trala participación do público con interesantes preguntas e achegas, Xosé Miranda animou á conservación do enorme Patrimonio Inmaterial que temos na Mariña e do que hai moi pouco recollido.

2ª xornada de literatura oral

2009-06-15T13:06:00.000-07:00

Mariñapatrimonio
convídao
á segunda das actividades do ciclo
O PATRIMONIO INMATERIAL : A LITERATURA ORAL
*
A conferencia
Guía da narrativa oral
estará a cargo do escritor
Xosé Miranda Ruiz*
e desenvolverase na
Casa das Letras
Librería e centro de actividades culturais en
RIBADEO
O VENRES día 19 de xuño, ás 20 horas

* Naceu en Lugo, moi preto da muralla, nun chalé que xa non existe, nos últimos días de 1955. Medrou nun barrio a medias obreiro, con moitos espacios aínda sen edificar, e grandes prados, hortas e chousas. Xogou moito ó aire libre cos seus amigos e leu algúns libros e tebeos. Licenciouse en Bioloxía na Universidade de Compostela, en 1978. É profesor de Bioloxía e Xeoloxía no Instituto Xoán Montes da súa cidade natal. Desde neno escribiu versos. As cidades mergulladas. Poesía reunida (1973-2002). En 1988 comezou a escribir prosa, relatos e novelas para adultos. Tén dous fillos. Para eles escribiu algúns libros do que se deu en chamar literatura infantil e xuvenil. No 2002, con 44 anos, atreveuse a publicar libros para nenos, como Lúa e os nubeiros, Feitizo, Aventuras do coello Federico, Ariadna e Pel de lobo. É especialista en literatura de tradición oral. Xunto a Antonio Reigosa e Xoán R. Cuba publicou moitos libros de contos populares galegos, dirixidos a un público infantil, reunidos na colección 'Cabalo buligán', da que é codirector, así como o Diccionario dos seres míticos galegos, a Pequena mitoloxía de Galicia, os Contos colorados, narracións eróticas da tradición oral e o recente Cando os animais falaban.

Para lembrar

2009-06-13T14:30:00.000-07:00

Mini e Mero, Mero e Mini, dous homes igual de complementarios que a palabra e a música que eles saben xuntar de xeito tan maravilloso. A sensación que tivemos os que estivemos onte no Conservatorio de Viveiro foi a de asistir a un momento especial, deses que se lembran para sempre, realizando un repaso polas diferentes formas nas que se manifesta a simbiose entre a poesía e a música, o xeito máis natural e eficaz de transmitir a cultura que tivo a sociedade ao longo da historia.

Para ver imaxes do evento pincha aqui:

http://picasaweb.google.es/lh/sredir?uname=mr.patrimonio&target=ALBUM&id=5346915803713095793&authkey=Gv1sRgCOO-yISrpdTBfA&invite=CO7R1C4&feat=email

Mondoñedo en “pe de guerra” fronte ás centrais hidroeléctricas

2009-06-13T12:52:00.000-07:00

A Plataforma Furapresas organiza diversos actos para reivindicar a conservación dos valores naturais, turísticos e culturais

Con motivo dos proxectos de centrais hidroeléctricas previstos nos ríos de Mondoñedo, o próximo fin de semana terán lugar diversos actos reivindicativos de cara a visualizar a oposición da sociedade a este tipo de actuacións que lesionan gravemente o medio ambiente, en espazos cualificados como Rede Natura (Europa e España) e Zona de Especial Protección dos Valores Naturais (Galicia).

O sábado 13 temos previsto unha proxección fotográfica na Praza do Concello ás 23:00 h., na mesma poderemos contemplar a beleza dos espazos naturais que albergan os ríos Tronceda e Figueiras, centrándonos nas áreas afectadas pola construcción das centrais hidroeléctricas.

O domingo 14 xuño imos realizar varios actos na defensa dos ríos Tronceda e Figueiras, e polo tanto tamén da Área Recreativa da Fervenza:

En primeiro lugar, as 12:30 h. iniciarase unha marcha reivindicativa que sairá do barrio dos Muiños e rematará na Área Recreativa de A Fervenza, e que terá o seguinte itinerario: Muiños - Praza da Catedral – Concello - San Lazaro - Coto da Redaeira - A Fervenza. Durante a marcha, contaremos co acompañamento de música a cargo dos participantes, e nas diversas escalas do percorrido farase lectura de manifestos alusivos á defensa dos ríos, e á conservación da Fervenza como espazo de lecer.
Remataremos a marcha cun xantar popular na Área Recreativa da Fervenza ás 14:30 h., ao que se pode asistir levando o propia xantar ou anotándose á lista do xantar organizado pola plataforma Furapresas (617353140 – 696452308), entre todos faremos unha boa festa.

Marcha reivindicativa: domingo 14 ás 12:30 h, dende Os Muiños (Mondoñedo).
Xantar popular: domingo 14 ás 14:30 h, na Área Recreativa da Fervenza.

http://www.furapresas.blogspot.com/

Destrución do anel lítico da Mourela

2009-06-12T15:50:00.000-07:00

Publicamos o seguinte documento emitido hai uns días pola Plataforma na Defensa do Patrimonio das Pontes, con motivo dos dous anos da destrución do anel lítico da mourela e o inicio da construción das gabias da autovía Ferrol-Vilalba, a día de hoxe fonte contaminante dos principais ríos do territorio.
Pincha aquí:
http://d.scribd.com/ScribdViewer.swf?document_id=16369136&access_key=key-2f1wqlln2gr23759qet1&page=1&version=1&viewMode

1ª Xornada de literatura oral

2009-06-09T10:20:00.000-07:00

O PATRIMONIO INMATERIAL: A LITERATURA ORAL

A literatura oral na canción galega
contará coa participación dos músicos
Xosé Luís Rivas e Baldomero Iglesias ( Mini e Mero )
e desenvolveráse no
Conservatorio Profesional de Música de Viveiro
( Travesía da Mariña )
O VENRES día 12 de xuño, ás 20 horas

Mini e Mero é un dúo de cantautores chairegos, formado por Xosé Luís Rivas Cruz (Mini, nado en Begonte o 18 de xuño de 1951) e Baldomero Iglesias Dobarrio (Mero, Vilalba, 27 de xuño de 1951), músicos, poetas, mestres e investigadores do folklore e a cultura tradicionais galegos, membros históricos de Fuxan os Ventos e actuais compoñentes de A Quenlla.
Ademais da súa produción discográfica cos devanditos grupos, teñen participado por separado ou conxuntamente noutros discos de música galega, como o Quiquiriqui producido no ano 2006 pola Asociación de Gaiteiros Galegos e en obras teatrais como Pan, catro propostas arredor da malla (creación e adaptación musical súa) e publicado diversos libros.
É salientable o seu labor de recompilación de contos, lendas, refráns, ditos ou poemas, principalmente na súa Terra Chá natal e nas zonas onde exercen o seu traballo de mestres: Mesía (Mero) e Boimorto (Mini).
O arquivo sonoro froito deste labor, e composto por milleiros de cintas magnetofónicas, foi cedido ao Museo do Pobo Galego para a súa dixitalización e incorporación ao Arquivo do Patrimonio Oral da Identidade, que ha estar dispoñible no web do museo.
No campo educativo son autores de diveros libros de texto de ciencias sociais, naturais e lingua galega para o ensino infantil e primario.
En abril de 2009 foilles concedido por unanimidade o Pedrón de Ouro como recoñecemento á súa traxectoria de corenta anos de investigación musical, galardón que recibiron o 24 de maio de 2009.

Presentación do ciclo de literatura oral

2009-06-05T11:20:00.000-07:00

MariñaPatrimonio presenta hoxe en Viveiro o ciclo adicado ao patrimonio inmaterial da literatura oral que se vai desenvolver nos venres do mes de xuño e xullo. Esta vez a actividade vai rotar pola comarca desde Viveiro a Ribadeo, Foz e O Valadouro-Alfoz. Convidamos desde aquí a toda a cidadanía da Mariña e doutros lugares a participar nestas actividades que van resultar, con toda seguridade, de grande interese.

Arredor do mar, de novo en San Cibrao

2009-05-30T13:28:00.001-07:00

A 2ª xornada do ciclo Arredor do mar, transcurriu, como estaba previsto coa visita previa á última carpintería de ribeira que nos queda, na que seu actual propietario, Francisco Fra, actuou como anfitrión.

A continuación desenvolveuse a conferencia, a cargo do historiador Dionisio Pereira, que disertou acerca do noso patrimonio marítimo, no mellor marco posible, o Museo do Mar.

Pódese ver aqui a reportaxe gráfica :

http://picasaweb.google.es/lh/sredir?uname=mr.patrimonio&target=ALBUM&id=5341710355415446625&authkey=Gv1sRgCNqwrq_cycq3Jg&invite=CK3Wq50F&feat=email

Voltamos ao ciclo Arredor do Mar

2009-05-26T00:47:00.000-07:00

Dentro do ciclo Arredor do Mar, iniciado hai uns meses coa conferencia de X. Ramón Fernández Pacios sobre os corsarios na costa luguesa, Mariñapatrimonio organiza unha nova actividade que se desenvolverá o vindeiro sábado día 30 de maio en San Cibrao

A xornada constará de dúas partes:

Na primeira, ás 17:30 horas, faremos unha visita guiada á Carpintaría de Ribeira de Fra en San Cibrao, ubicada no paseo marítimo (preto da Casa do Mar) onde nos explicarán como se construian os pailebots , os trincados... o traballo dunha das familias que desde hai moitos anos se dedicou á construción de barcos neste porto.
E a segunda parte desta actividade é a conferencia do historiador Dionisio Pereira González* que, no Museo do Mar de San Cibrao,ás 18:30 horas, falará do noso patrimonio marítimo.
Agardamos que estas actividades, sexan do interese xeral.

*Dionisio Pereira González é un economista e historiador coruñés, nacido en 1953. Traballa como profesor de Ensino Medio.
Xunto con A. Martínez, Manuel González Probados e X. Castro formou o Colectivo de Historia Xerminal.
En 1994 foi elexido primeiro presidente da Federación Galega pola Cultura Marítima e Fluvial, nacida o ano anterior en Ribeira.
E autor de moitos traballos publicados en libros e revistas, entre as que, sinalamos:
-Actividades marítimas na Galiza contemporánea; Relatorio presentado no Congreso "O mar na Historia de Galicia"; Universidade de Vigo, 1996.
"O mar dos galegos no tempo de Manoel Antonio", en Manuel Antonio: Embarcados nun cantar. Ed. A Nosa Terra, 1996 (colección A Nosa Cultura nº 16).
"Mariñeiros do Gran Sol: os últimos da fila"; Revista Inzar Razóns nº 16, 1997.
O Asociacionismo dos pescadores na Galiza de anteguerra: unha ollada de conxunto; Ateneu Libertário Ricardo Mella, 2004.

Os cambios administrativos do s. XIX remataron o ciclo de Hª de Galiza

2009-05-26T00:30:00.000-07:00

Da nova ordenación territorial derivada do triunfo lo liberalismo na España da primeira metade do s. XIX, falou o noso viciño mariñán de Moucide, o historiador Prudencio Vivero Mogo, ilustrando en particular os cambios que supuxo na comarca da Mariña, tanto na configuración dos partidos xudiciais como, sobre todo, dos concellos.

A disertación e posterior coloquio resultou altamente interesante para todos os asistentes.

Este sábado remata o ciclo de Historia de Galiza

2009-05-21T11:48:00.000-07:00

A Asociación Sociocultural Mariñapatrimonio remata o vindeiro sábado 23 de maio o ciclo de actividades arredor da Historia de Galiza.
O relatorio deste sábado estará a cargo do historiador Prudencio Viveiro Mogo é tratará dos cambios do século XIX na Mariña de Lugo.
Viveiro Mogo ( Valadouro, 1974) é licenciado en Xeografía e Historia pola Universidade de Santiago de Compostela. Traballa no Consello da Cultura Galega.

A conferencia celébrase no Museo de Mar de San Cibrao, ás 18:30 horas.

A Mariña medieval foi o tema da 3ª Xornada de Historia de Galiza

2009-05-16T15:44:00.000-07:00

O día foi chuvioso, pero intenso. Pola mañá todos os que nos achegamos a Lourenzá para ver a Fortaleza de Tovar, na parroquia de Sto. Tomé, quedamos gratamente sorprendidos pola importancia desa edificación medieval que posuiu un caracter defensivo e tamén residencial e que merece sen ningunha dúbida da atención das administracións que poden preservar e poñer en valor este imponente edificio medieval. Non abundan na comarca elementos patrimoniais de período medieval de tal calibre.

Enlace para ver fotos da visita:

http://picasaweb.google.es/lh/sredir?uname=mr.patrimonio&target=ALBUM&id=5336534121518359921&authkey=Gv1sRgCIOn2bbt_J6QAg&feat=email

Completouse a xornada de mañá cunha rápida pero interesante visita ao Mosteiro de San Salvador, en Vilanova.

Pola tarde a conferencia resultou un éxito de público e non defraudou a ninguén. O ponente, Anselmo López Carreira presentou de forma brillante, amena e exhaustiva unha síntese do período das Guerras Irmandiñas e do papel xogado neste contexto histórico polo Mariscal Pardo de Cela, deixando moi ben definida a imaxe real deste nobre mariñán que viviu na segunda metade do s. XV.

3ª Xornada de Historia de Galiza, de novo na Mariña

2009-05-11T15:45:00.000-07:00

A etapa medieval vai centrar o contido desta xornada, que vai servir para que coñezamos un ben patrimonial que permaneceu oculto para a maioría da poboación mariñana a pesar do seu indubidable interese. Trátase dunha fortaleza situada na parroquia de Sto. Tomé de Lourenzá, os seus actuais propietarios, empeñados na súa posta en valor, van recibirnos e ensinarnos este singular edificio.

A continuación, aproveitando que estamos nese concello imos visitar o Museo de Arte Sacro do Mosteiro de Vilanova de Lourenzá.

A saída para a xornada de mañá esté prevista para as 11:00 horas desde o Museo do Mar de San Cibrao. As persoas interesadas en participar nesta visita e non queiran iniciala desde o punto de orixe, poden chamar aos telefonos 690650542 ou 616815120.

Xa pola tarde, voltaremos ao Museo de Mar, para asisitir á conferencia de Anselmo López Carreira, a partir das 18:30 horas.

2ª xornada de Historia en Lugo

2009-04-29T13:44:00.000-07:00

Tampouco este sábado a choiva nos impediu disfrutar desta xornada na que tivemos como anfitrión de luxo ao maior experto na muralla de Lugo, o historiador Adolfo de Abel Vilela, que nos guiou polo lugo romano e medieval pola maña e nos deleitou cunha proveitosa explicación, no refectorio do Museo Provincial, da historia de Lugo ao traveso da súa muralla bimilenaria.

O devandito Museo Provincial foi outro dos argumentos do día, posto que tivemos a ocasión de realizar unha visita guiada polas salas máis importantes.

Temos imaxes deste evento aquí:

http://picasaweb.google.es/mr.patrimonio/2XornadaDeHistoriaDeGalizaEnLugo?feat=email #

Achádego paleolítico en San Cibrao

2009-04-23T08:39:00.000-07:00

Mariñapatrimonio , seguindo as instrucións da Dirección Xeral de Patrimonio, depositou no Museo do Mar de San Cibrao un útil lítico atopado na zona de Pedrosa de San Cibrao.
Segundo os expertos consultados por Mariñapatrimonio, este útil lítico data do Paleolítico Inferior e pode ter uns 300.000 anos de antigüidade.
Esta peza arqueolóxica é de grande interese porque supón o vestixio máis antigo da presenza humana no concello de Cervo.

Pódense ver máis fotos no seguinte enlace:

http://picasaweb.google.es/mr.patrimonio/UtilLiticoAtopadoNaZonaDePedrosaDeSanCibrao #

2ª xornada de Historia de Galiza, en Lugo

2009-04-20T14:59:00.000-07:00

O ciclo continúa o próximo sábado 25. Esta vez desprazámonos a Lugo. O motivo é que toca a Galiza romana e ¿que mellor que Lucus Augusti para ilustrar esa etapa?

Dende MariñaPatrimonio convídase e anímase aos mariñáns e non mariñáns que nos acompañen. Sairemos en autobús desde San Cibrao e visitaremos o Museo Provincial e a muralla e finalmente haberá unha conferencia -tamén no museo- de Adolfo de Abel Vilela.

Todos aqueles e aquelas que se animen deben comunicalo a MariñaPatrimonio -a máis tardar o mércores- e utilizando os medios habituais:

Tfnos: 616815120 / 690650542

Mail: mr.patrimonio@gmail.com

1ª xornada de Historia de Galiza

2009-04-20T14:36:00.000-07:00

O tempo non axudou moito para realizar o roteiro polos castros de Ribadeo, pero eso non impediu que cumprísemos o programa

Pola tarde a conferencia de Antonio de la Peña resultou brillante. Un auténtico privilexio poder contar cunha das máximas autoridades sobre a historia da Galiza prerromana. O seu relato resultou ameno e sorprendente, desmitificando unha boa cantidade de tópicos que aínda permanecen no imaxinario popular sobre a orixe do pobo e da cultura galegos, en particular a idea dun pasado celta, que esta desbotada totalmente pola investigación prehistórica seria.

Pincha neste enlace para ver imaxes da xornada do sábado:

http://picasaweb.google.es/lh/sredir?uname=mr.patrimonio&target=ALBUM&id=5326874215363987665&authkey=Gv1sRgCM7A_PqT-5T-ag&invite=CPmokJwK&feat=email

Este sabado arranca o Ciclo de Historia co período castrexo

2009-04-15T00:48:00.001-07:00

Pola mañá visita aos castros costeiros de Ribadeo. Dado que se trata de actividades abertas ao público en xeral, para sumarse a ela convócase aos interesados/as ás 11:00 horas na praia das Catedrais. Desde ali iniciaremos o roteiro polo litoral con tramos en coche o outros a pé.

Pola tarde, a conferencia do arqueólogo Antonio de la Peña desenvolverase no Museo de Mar de San Cibrao ás 19:00 horas, coa mesma premisa de apertura a todo o público interesado.

Para ampliar información acerca de calquer aspecto, podese contactar con MariñaPatrimonio no enderezo electrónico ou no teléfono de contacto que se indica
mr.patrimonio@gmail.com
Tfno. 616815120

MariñaPatrimonio presenta o Ciclo de Historia de Galiza

2009-04-15T00:19:00.000-07:00

No Museo do Mar de San Cibrao, coa presenza de Antón Veiga, responsable da Area de Cultura da Deputación Provincial de Lugo, que subvenciona esta actividade, a xunta directiva de MariñaPatrimonio presentou o Ciclo de Historia de Galiza que arranca o próximo 18 de abril e desenvólvese nos sábados sucesivos.

O ciclo percorre os distintos períodos prehistórico e históricos con visitas á fitos do noso patrimonio en horario de mañán e conferencias en horario de tarde a cargo de ponentes especialistas en cada un dos períodos históricos.

A Axencia de Protección da Legalidade Urbanística solicita información ao Concello de Cervo sobre as obras que se realizan no Castro da Atalaia

2009-03-28T15:10:00.000-07:00

A instancia de MariñaPatrimonio, este organismo, dependente da Consellería de Ordenación do Territorio, require ao Concello mediante una comunicación escrita do pasado 25 de marzo, a presentar no prazo de 10 días toda a documentación relativa ás licenzas de obra concedidas no Castro da Atalaia a Promociones San Ciprián, que propiciaron a destrución parcial do Castro e que continúan en construción.
Achegase en documento adxunto o requerimento recibido polo Concello de Cervo ao que facemos referencia.

Preme aqui:
http://www.scribd.com/doc/13740096/Sol-Urbanismo-Inf-Licenz-Atalaia-250309

Reportaxe de TeleLugo sobre o Castro da Atalaia e a sauna castrexa

2009-03-15T04:33:00.000-07:00

MARIÑAPATRIMONIO denuncia ante a Dirección Xeral de Patrimonio Cultural novas destrucións no xacemento arqueolóxico do Castro da Atalaia

2009-03-13T04:46:00.000-07:00

MARIÑAPATRIMONIO denuncia ante a Dirección Xeral de Patrimonio Cultural novas destrucións no xacemento arqueolóxico do Castro da Atalaia e esixe a inmediata paralización das obras

MARIÑAPATRIMONIO esixe a inmediata paralización das obras no castro da Atalaia,despois de comprobar que Promociones San Ciprián vén de realizar novas destrucións neste xacemento, demostrando así a súa mala fe e a intención de ir aos poucos desfacéndose dun patrimonio arqueolóxico que lle é molesto para os seus intereses inmobiliarios.
O xacemento arqueolóxico do Castro da Atalaia de San Cibrao ( Concello de Cervo), está en perigo por mor da construción do “RESIDENCIAL FARO DE SAN CIPRIAN" (3 edificios con un total de 100 vivendas, promovidos por Promociones San Ciprián, S.L). O Concello deu licencia de obra sendo plenamente consciente de que alí había un castro.
FEITOS:

O 10 de xaneiro de 2008, segundo o informe do arqueólogo Emilio Ramil, na primeira parcela destinada á construción dun edifico de 42 vivendas no castro da Atalaia de San Cibrao quedaba unha área arqueoloxica sen alterar de 200m2 máis outros 60m2 pendentes de escavación, o que fai un total de 260m2.

O 14 de abril de 2008 a Dirección Xeral de Patrimonio Cultural autoriza movementos de terra e desmontaxe das estruturas localizadas nunha superficie escavada de 68,25 metros.
En consecuencia, quedaron 191,75m2 de área arqueolóxica sen alterar.

Destes 191,75m2 de área arqueolóxica sen alterar só quedan 15m2. Promociones San Ciprián, destruíu completamente o resto da área non afectada do xacemento arqueolóxico inventariado,

MARIÑAPATRIMONIO esixe, por tanto, a inmediata paralización das obras no castro da Atalaia e que, a maiores das sancións administrativas que poidan corresponder, se poña en coñecemento do Ministerio Fiscal a reiterada destrución do patrimonio arqueolóxico histórico co agravante de ter provocado a completa destrución dunha parcela do xacemento arqueolóxico inventariado.

XUNTAMOS ARQUIVO COA DENUNCIA:

MARIÑAPATRIMONIO Denuncia Ante a Dirección Xeral de Patrimonio 1

Publish at Scribd or explore others:

Castro de Fazouro

2009-02-27T10:59:00.000-08:00

A Dirección Xeral de Patrimonio iniciou os trámites para declarar BIC ( Ben de interese cultural) o castro mariñán de Fazouro (Foz).
Amosámosvos unha imaxes deste castro, abatido polas ondas, nun dos temporais que nos deixou este cru inverno.

527 sinaturas respaldan a denuncia de Mariñapatrimonio ante a D.X. de Urbanismo

2009-02-17T11:49:00.000-08:00

Mariñapatrimonio xunto con 527 persoas, preocupadas polo futuro da Atalaia de San Cibrao , denunciamos ante a Dirección Xeral de Urbanismo a concesión de licenzas por parte do concello de Cervo para a construción de tres edificios sobre o xacemento arqueolóxico do Castro da Atalaia. Os asinantes desta denuncia consideramos que as tres licenzas foron outorgadas con manifesto incumprimento da lexislación urbanística e da lexislación do patrimonio, polo que requirimos a intervención da autoridade competente en materia urbanística para, tomando en consideración a nosa denuncia,se leven a cabo as accións pertinentes para repoñer a legalidade e se protexa un ben patrimonial que é de todos e todas.

Os feitos nos que baseamos a nosa denuncia son os seguintes:
As tres parcelas nas que se pretenden executar estes proxectos de edificación están ubicadas no Castro da Atalaia, onde, no momento de outorgarse as respectivas licenzas urbanísticas, a Alcaldía e demais membros da Xunta de goberno coñecían a existencia dun xacemento arqueolóxico. Para poder conceder estas licenzas, o concello precisa un informe sectorial previo das autoridades competentes en materia de protección do patrimonio. As tres licenzas carecen deste informe sectorial.
A cualificación do solo correspondente a estas tres parcelas para as que foron outorgadas as licenzas urbanísticas é, segundo as Normas Subsidiarias de Planeamento do concello de Cervo (do ano 1978 e modificadas en 1998 para adaptación á Lei de Adaptación do Solo de Galicia), a de SOLO URBANO para usos I/RM (Industrial e Residencial Mixto. A ordenanza do planeamento para este tipo de solo, esixe que, para cada solar, o Concello estableza “a modalidade de ordenación acorde co entorno do mesmo” establecendo, ademais, que “nas zonas de transición ou indiferenciadas, así como nas parcelacións de ordenación mixta se efectuará previamente un Estudo de Detalle” (punto 4.3.4 das Normas Subsidiarias do Planeamento de Cervo). Non consta a aprobación de ningún Estudo de Detalle previo á concesión destas licenzas de edificación.
Polo tanto os 527 asinantes desta denuncia, xunto con Marinapatrimonio, consideramos que as tres licenzas concedidas, foron outorgadas con manifesto incumprimento da lexislación urbanística e lexislación do patrimonio vixentes, polo que requirimos a intervención da autoridade competente en materia urbanística para, tomando en consideración as nosas denuncias, se leven a cabo as accións pertinentes para repoñer a legalidade e desa forma protexer o Castro da Atalaia.

Pincha neste enlace para ver máis fotos:

http://picasaweb.google.es/lh/sredir?uname=mr.patrimonio&target=ALBUM&id=5303090268862483569&authkey=frqj06z-bqk&invite=CMTpkPkK&feat=email

Pincha neste enlace para ver o documento completo da denuncia:

http://www.scribd.com/doc/12544914/DENUNCIA-Marinapatrimonio

Cantos máis mellor

2008-12-13T13:03:00.000-08:00

Mediante esta campaña de captación de socios e socias, MariñaPatrimonio aníma a toda a cidadanía a participar máis activamente na defensa e o disfrute do patrimonio.

Se queres sumarte á nosa asociación cumprimenta o impreso de inscrición que se pode descargar aquí e faino chegar á xunta directiva.

A cuota de inscrición é de 10 €

Descarga aquí: http://documents.scribd.com/docs/a24sb5fx9hn0k5hhk0l.pdf

Estudio do cuncheiro do Castro da Atalaia

2008-11-16T14:51:00.000-08:00

Meses antes da concesión das licenzas urbanísticas que ameazan o Castro da Atalaia, como resultado da realización dunha obra próxima ao cantil do faro, apareceu un cuncheiro vinculado ao castro, que foi analizado por arqueólogos da Dirección Xeral de Patrimonio e do que se emitiu un informe, que amosamos aquí:

http://pdfmenot.com/store_local/99c77c561927b689fb347fc7589ec2c3.pdf

Que son as saunas castrexas?

2008-11-16T14:13:00.000-08:00

A web culturagalega.org publica unha entrevista moi interesante , o asturiano Ángel Villa Valdés, arqueólogo da Dirección Xeral de Patrimonio Cultural do Principado de Asturias, quizais o maior especialista mundiail en saunas castrexas, na que se explica en que consiste unha sauna castrexa e valora a importancia destas instalacións, que califica como "conxunto patrimonial de primeira orde na arqueoloxía protohistórica europea".

http://www.culturagalega.org/noticia.php?id=13395

Posible muralla do castro da Atalaia

2008-11-16T14:07:00.000-08:00

Cabe a posibilidade de que unha parte da muralla do castro da Atalaia estea ao descuberto. MariñaPatrimonio amosa as fotos neste enlace

http://picasaweb.google.es/manuelmirandaruiz/PosibleMuralla#

Viva nun castro costeiro

2008-11-16T13:54:00.000-08:00

Facémonos eco desta magnífica entrada na que se sintetiza maxistralmente o sucedido na Atalaia de San Cibrao

http://www.blogoteca.com/arqueoloxia/index.php?cod=45179

OS HABITANTES DOS CASTROS

2008-11-03T13:32:00.000-08:00

O pasado venres, día 31 de outubro, Mariñapatrimonio organizou unha nova actividade. Nesta ocasión tratouse dunha didáctica e interesante Charla sobre Os habitantes dos castros a cargo do arqueólogo Eduardo Ramil Rego. O acto tivo lugar na Casa da Cultura de San Cibrao.
Nesta Charla, despois dunha introdución sobre as fases do fenómeno castrexo, falouse sobre os asentamentos, a súa organización interna, a economía, a vida cotiá, a artesanía e a arte.
Ao remate do relatorio, os asistentes interviron con preguntas que axudaron a coñecer mellor diferentes aspectos do fenómeno cultural castrexo.
Ese mesmo día inaugurouse unha exposición sobre este mesmo asunto que permanecerá aberta até o día 14 de novembro nas dependencias da Casa da Cultura de San Cibrao.
Eduardo Ramil Rego é arqueólogo e director do Museo de Prehistoria e Arqueoloxía de Vilalba e autor dos libros Os primeiros campesiños de Galicia:neolítico e megalitismo e Os primeiros moradores de Galicia, así como de moitos artigos en revistas especializadas e colaboracións en obras colectivas.
A Asociación Mariñapatrimonio segue interesada en contribuír á posta en valor do noso patrimonio e agarda que esta Charla e maila exposición, contribúan a coñecermos mellor o noso pasado.
Dende Mariñapatrimonio queremos agradecer ao Museo de Prehistoria e Arqueoloxía de Vilalba e ao seu director Eduardo Ramil a súa colaboración nestes actos.

Conferencia-exposición sobre "Os habitantes dos castros"

2008-10-28T14:36:00.000-07:00

MariñaPatrimonio esta empeñada en sensibilizar á cidadanía da importancia do Castro da Atalaia. É por iso que programa esta actividade divulgativa que inclue unha exposición que permanecerá quince dias aberta ao público.

Novo e grande achádego na Atalaia

2008-10-25T14:53:00.000-07:00

MariñaPatrimonio trasladou hoxe aos medios de comunicación un novo achádego que, de confirmarse, incrementa notablemente a importancia do Castro da Atalaia

En xullo de 1974 no transcurso dunhas obras na Atalaia de San Cibrao nunha horta da chamada “a casa de Dorita “, descubriuse un edificio soterrado na area. Debido á importancia do achádego, a Dirección General de Bellas Artes paralizou as obras e realizou unhas escavacións arqueolóxicas., crese que baixo a dirección de Manuel Chamoso Lamas. As escavacións foron visitadas polo Presidente da Deputación Provincial de Lugo o día 20 de xullo.
O diario El Progreso fíxose eco desta noticia, segundo comprobamos,nas publicacións do 12, 13, 17 e 21 de xullo dese ano; porén, e a pesar da intensa búsqueda, non conseguimos ningún informe das escavacións.
Como é ben sabido, hai algo máis dun ano que os veciños de San Cibrao, especialmente os da Atalaia, veñen traballando para que o castro da Atalaia, vítima da cobiza construtora e da desidia dos que gobernan, non desapareza. Durante este tempo escoitamos con verdadeiro interese o relato dos recordos que os veciños gardan sobre o edificio da horta de Dorita: a súa localización, a súa forma rectangular, as escaleiras de acceso, os bancos corridos nunha das súas salas, unha especie de ventá, a cuberta de falsa bóveda sobre a que descansa unha laxe de granito de grandes dimensións, a existencia de túneles…Todos aseguran que o edificio foi novamente tapado e que aínda se conserva.
Estes datos achegámosllos a varios arqueólogos para que nos explicasen que podía ser esta construción. A resposta foi clara: estabamos describindo un tipo de construción castrexa coñecida como monumento con forno tamén denominada pedra formosa, sauna castrexa ou balneario castrexo.
Os monumentos con forno aparecen en moi poucos castros, trátase dunha construción de carácter monumental que teñen un forno e cumpren a función de sauna- balneario. Estas saunas seguen todas o mesmo modelo de ubicación e de construción: sitúanse nunha zona de acceso ao castro, ademais están semienterradas e contan cunha escaleira para acceder ás salas; son de planta rectangular, teñen varias estancias ( vestíbulo, antecámara, cámara e forno). Unha das salas ten bancos corridos e están cubertas por unha falsa bóveda. A suposta ventá, da que falan os veciños, podería ser o oco que comunicaba a cámara co forno e os túneles servían para a condución da auga.
As fotos publicadas por El Progreso nas datas que indicabamos arriba, confirmáronnos a veracidade dos datos aportados polos veciños: vense as escaleiras de acceso, a falsa bóveda, a enorme laxe sobre a bóveda e a “ventá” ( ou a posible unión entre a cámara e o forno), da que o periodista comenta:
“ En el interior de la cueva- puede verse en las fotografías de Sergio- aparece una especie de horno formado por dos columnas y un dintel”.
Todo isto indícanos que, posiblemente, no castro da Atalaia teñamos un monumento con forno, sería o terceiro de Galiza. No noroeste da Península Ibérica, no territorio que ocupou a cultura castrexa (Portugal, Asturias e Galiza), na actualidade coñecemos16 balnearios castrexos. Co do castro da Atalaia sumarían 17, coa particularidade de que este sería o mellor conservado e o único que mantería a falsa bóveda. De confirmárense as nosas teorías, para o que cumpriría escavar e estudar outra vez o edificio, estariamos ante unha sauna castrexa practicamente intacta, o que suporía unha das descobertas máis importantes do mundo castrexo dos últimos anos.
Dende Mariña Patrimonio, debido á importancia dos achádegos do xacemento da Atalaia, ameazado pola especulación urbanística, agardamos que entre todos se atope unha solución, se evite a incomprensible destrución do noso patrimonio e que definitivamente se paralicen as obras e se anulen as licenzas de construción para, así, protexermos este valioso xacemento.
Salvemos o castro da Atalaia.

As fotos do monumento con forno publicadas en El Progreso poden verse no seguinte enlace:
http://picasaweb.google.es/mr.patrimonio/MonumentoConFornoSaunaCastroDaAtalaia#

Xosé Ramón Fernández Pacios falou de corsarios na Mariña nos seculos XVIII e XIX

2008-10-25T14:21:00.000-07:00

O público que se achegou ao Museo de Mar de San Cibrao na tarde de onte saiu ben satisfeita da conferencia que o investigador focense Fernández Pacios nos regalou. O relato, rigoroso e ameno, serviu para realizar un percorrido pola actividade de barcos con patente de corso e dos seus tripulantes corsarios, de procedencia inglesa, francesa, vasca e mesmo galega, que se achegaron ás nosas costas aló polo século XVIII e tamen no XIX.