8/09/2008

UN ARQUEÓLOGO ENVIADO POR CULTURA CONFIRMA O ACHÁDEGO DE TRES PETROGLIFOS NO CASTRO DA ATALAIA DE SAN CIBRAO



O dia 8 de agosto un arqueólogo, enviado pola Delegación Provincial da Consellería de Cultura, acompañado por Manuel Miranda membro da nosa Asociación, visitou o Castro da Atalaia de San Cibrao para inspeccionar os achádegos de gravados rupestres sobre os que Mariñapatrimonio informou o pasado mércores.


O arqueólogo confirmou que, sen dúbida, existen alomenos 3 petroglifos e outro dubidoso debido ao estado de deterioro que presenta, xa que se ten feito lume enriba da pedra. Este técnico da Consellería de Cultura e Deporte terá agora que emitir un informe sobre estes gravados e cando isto sexa confirmado oficialmente os lugares onde se atopan estes petroglifos pasarán a ser considerados BIC ( Ben de Interese Cultural ) e ficarán, por tanto protexidos.


Mariñapatrimonio considera que o descubrimento destes gravados rupestres é importantísimo para a nosa comarca pois, como xa se dixo, serían as primeiras mostras de arte rupestre na zona. A existencia de pretroglifos no Castro da Atalaia contribúe a pór en valor este lugar tan destragado pola especulación urbanística que estamos a soportar.


Mariñapatrimonio fai un chamamento para que veciños e visitantes respecten esta zona e para que a Administración—Concello e Xunta de Galiza—paralicen dunha vez por todas a desfeita do Castro.


A confirmación da existencia destas mostras de arte rupestre é unha moi boa noticia para todos e anímanos a seguir traballando na defensa e divulgación do noso rico patrimonio.
Seguimento na prensa:

1 comentário:

Castrexo disse...

O achádego de Mariñapatrimonio é unha boa noticia de confirmarse. A declaración de Ben de Interese Cultural destos petroglifos podería mudar a protección que ten a área aledaña ao castro da Atalaia. Pero Mariñapatrimonio tamén debe saber que o organismo competente en materia de protección do patrimonio é a Consellería de Cultura quen -inexplicablemente- garda silenzo sobre os plans do departamento de Bugallo nesta zona e, o que aínda é máis grave, permite a continuidade das obras e, porén, da destrucción dos posibles restos. A proximidade que moitos de vos tedes ao BNG debería esquecerse por un momento e, en consecuencia, deberíades esixir alí onde corresponde a correcta preservación do castro. Todo o demáis e facer o xogo político a uns políticos que pasan do noso patrimonio