Roteiro Rueta - Sargadelos

O pasado domingo, acompañados dun tempo excelente para camiñar, iniciabamos a tempada de actividades de outono en colaboración coa Asociación cervense, A Fervenza de Sargadelos, cunha tranquila e cómoda ruta pola beira do río Xunco desde a súa desembocadura en Rueta ata o seu paso polo conxunto histórico de Sargadelos.

A andaina foi precedida dunha visita á punta de Rueta, onde se ubica un dos castros costeiros máis interesantes da comarca, pola súa atípica forma e as súas imponentes defensas. A limpeza do seu acceso, realizada polos operarios municipais, permitiu entrar neste xacemento, que permanece moi ben conservado debido á súa ubicación. Puidemos ver tamén os petróglifos que se atopan na proximidade do castro, en particular, o único con círculos concéntricos atopado na comarca.

Río arriba percorremos o abundante conxunto de muíños que o Xunco alimentaba en tempos pasados, dos que desgrazadamente só se conservan a metade, algúns deles certamente espectaculares pola súa dimensión e que merecerían unha intervención a prol da súa conservación.

A xornada rematou cara ó mediodía no entorno do Conxunto Histórico de Sargadelos, onde o nutrido grupo de 60 participantes fixo a pertinente foto e amosou a súa satisfacción pola fermosa mañá que pasamos xuntos.

Debemos agradecerlle ao Concello de Cervo a súa importante colaboración, aportando o autobús para o traslado dos participantes ao inicio da ruta, pola preparación do sendeiro e pola difusión deste evento. Tamén agradecerlle a Alberto Viamonte, que nos permitiu entrar na súa propiedade para visitar os petróglifos de Rueta e á Asociación amiga da Fervenza, pola súa boa disposición e traballo.

A segunda parte desta colaboración vai ser convocada proximamente para realizar o día 27 de outubro unha ruta diferente, pero non menos interesante, que percorre o concello de Cervo pola súa zona central, cresteando os montes Cabaleiros para rematar na Senra.