A actividade, “Conversa arredor de Seoane e Díaz Pardo, que conta coa colaboración da Vicepresidencia da Deputación Provincial de Lugo, terá lugar o vindeiro sábado 12 de decembro e poderá seguirse na páxina de Facebook de Mariña Patrimonio a partir das 19.00h.
O pasado xoves rematou a escavación arqueolóxica no xacemento de O Coído, situado no lugar de Pedrosa - Cuíña (San Cibrao – Cervo), promovida por Mariña Patrimonio e realizada pola empresa Gabinete e Arqueoloxía e Xestión do Patrimonio. As sondaxes arqueolóxicas, dirixidas pola arqueóloga da Universidade de Santiago, María Martín, confirmaron a existencia dun importante xacemento, no que se achou unha inxente cantidade de restos cerámicos. A cerámica, xunto con outras mostras recollidas no sitio arqueolóxico, serán estudadas na Universidade de León e mais no Museo Arqueolóxico de Vilalba.
No marco das actividades online programadas por Mariña Patrimonio, o vindeiro 27 de novembro terá lugar a presentación do libro Contrahistorias de Galicia, do autor mindoniense Antonio Reigosa.
Contrahistorias de Galicia é un libro singular, con textos breves e fermosas ilustracións de Rita Gutiérrez, no que Reigosa recolle datos curiosos sobre diferentes personaxes, uns coñecidos e outros “esquecidos e ignorados pola historia oficial”, en palabras do propio autor.
Nestas contrahistorias, ademais do torque de Burela, atopamos tamén personaxes da Mariña como Eustorgia Acebo, Antonia Díaz Pérez ou o Merlín de Cunqueiro.
Na actividade, que se poderá seguir a partir das 19.30 a través do facebook de Mariña Patrimonio, intervirán o autor Antonio Reigosa, a ilustradora Rita Gutiérrez e mailo editor Miguel Noval.
A asociación sociocultural Mariña Patrimonio vén de documentar un novo castro no concello de Mañón (A Coruña).
O xacemento, situado na Ría do Barqueiro, concretamente na Punta Preguntoiro, na parroquia de Mogor, ten unha forma ovalada de aproximadamente uns 110x85 metros de diámetro. Aínda que o sitio arqueolóxico se atopa plantado de eucaliptos e cuberto dunha espesa matogueira, obsérvanse claramente tanto o foxo coma o parapeto que defendían este antigo poboado.
O castro conserva parcialmente desenterrada o que podería ser a sétima sauna castrexa atopada en Galicia
As Asociacións Culturais Mariña Patrimonio e Irmandade Santo Estevo veñen de descubrir un novo castro no Lugar de A Maradona, parroquia de San Xusto de Cabarcos no Concello de Barreiros (Lugo). Este novo sitio arqueolóxico foi localizado trala corta no monte de eucaliptos, que ocultaban o xacemento. O castro, que está situado nun esporón rochoso a modo de península, formada entre o río Masma e o rego Puxigo, ten uns 110m de longo por uns 50 de ancho. No ismo desta península atópase un impresionante foxo picado na rocha que se converte en foxo dobre na metade do seu traxecto. Xa no interior do castro, xusto na entrada, apréciase unha edificación parcialmente desenterrada na que se pode ver un muro recto duns tres metros, que remata nunha cabeceira semicircular. Esta edificación semella que conserva o arranque dunha falsa bóveda construída por aproximación de fiadas. Tanto polas características desta construción como pola súa ubicación podería tratarse dunha sauna castrexa.
En Galicia só se coñecen as saunas castrexas de Santa Mariña de Augas Santas (Allariz), Borneiro (Bergantiños) , Espasante (Ortigueira), O Sarridal (Cedeira), Castañoso (A Fonsagrada) e a de A Atalaia (Cervo). De confirmarse como sauna a edificación do castro da Maradona, sería a sétima das atopadas en Galicia.
Trala descuberta deste novo xacemento en Barreiros, e despois de comprobar que non figuraba no Catálogo de Bens Patrimoniais, Mariña Patrimonio e Irmandade Santo Estevo informaron ao Servizo de Arqueoloxía de Santiago sobre este achado así como dos movementos de terras que se tiñan realizado no lugar para ampliar pistas forestais. Por outro lado, ante a posibilidade de que labores de repoboación puidesen afectar o xacemento, solicitáronlle á DXPC que adoptase as medidas necesarias para protexer este ben patrimonial. Aínda que dende o Servizo de Arqueoloxía se contestou que daban traslado de todos os datos ao Servizo de Vixilancia e ao Servizo de Patrimonio de Lugo, tendo en conta a posible relevancia do achado e debido a que sistematicamente a Dirección Xeral do Patrimonio Cultural - Consellería de Cultura desatende as solicitudes nas que figura Mariña Patrimonio, ambas sociacións concertaron unha entrevista coa alcaldesa de Barreiros, Ana Ermida, para informala da descuberta do novo xacemento así como do boicot da Consellería de Cultura. O pasado venres 11 de setembro, grazas ás xestións realizadas por Ana Ermida, un arqueólogo do Servizo de Arqueoloxía de Santiago achegouse a Barreiros para inspeccionar o xacemento da Maradona. Trala inspección do lugar, o técnico de Patrimonio confirmou a existencia do castro e sinalou que a edificación que aparece no xacemento, pola súa morfoloxía e ubicación, podería tratarse dunha sauna, mais para poder aseguralo cumpriría facer unha escavación arqueolóxica.
Enlace Fotos:
Mariña Patrimonio vén de solicitar á Dirección Xeral do Patrimonio Cultural a catalogación e protección de dúas novas mámoas descubertas na parroquia da Rigueira, no Concello de Xove (Lugo).
Grazas á información facilitada por un profesor da zona, Mariña Patrimonio puido localizar no lugar de Corveira unha das mámoas máis monumentais da Mariña, que conta cuns 20m de diámetro e uns 2m de alto.
A plantación de eucaliptos, que se realizou recentemente sobre este monumento megalitico, deixou á vista parte da coraza pétrea que cobre a mámoa. Os citados labores forestais afectaron especialmente a parte superior da mámoa onde, a pesar de todo, se aprecia claramente o cono de violación.
Por outra banda, Mariña Patrimonio descubriu no lugar de Labradela o túmulo de Modia de Lamoso. Esta mámoa ten uns 14m de diámetro, apréciase o cono de violación e restos da coraza. Como acontece co túmulo de Corveira, este monumento está tamén afectado por unha plantación de eucaliptos.
Debido a que nos últimos tres anos a Dirección Xeral do Patrimonio Cultural non atende as solicitudes presentadas por Mariña Patrimonio, son moitos os bens patrimoniais que quedan fóra do Catálogo e, polo tanto, desprotexidos. Por este motivo, a asociación achegou ao Concello de Xove outra solicitude para que inste á DXPC a catalogar e protexer estes dous novos monumentos megalíticos aparecidos no seu concello.
Excepcionalmente a mámoa de Guilán, descuberta por Mariña Patrimonio en 2017, figura no Catálogo de Bens Patrimoniais grazas a que nese momento a asociación decidiu presentar a solicitude a través doutra persoa. Porén, non correron a mesma sorte outros seis bens patrimoniais descubertos no mesmo ano e cuxas solicitudes asinou Mariña Patrimonio. Por iso, espera que a Dirección Xeral do Patrimonio Cultural remate co seu pueril boicot contra a citada asociación e cumpra coa súa obriga de catalogar e protexer o patrimonio.
Enlace fotos Mámoa Corveira: https://photos.app.goo.gl/UzPxSQMdJtGtJFj88
As Asociacións Culturais Mariña Patrimonio e Irmandade Santo Estevo veñen de descubrir no Concello de Barreiros (Lugo) dous novos xacementos arqueolóxicos. En Penabor localizaron unha mámoa duns 15m de diámetro, que presenta cono de violación e destaca a presenza de tres ortostatos do dolmen, mentres que a mámoa do Cruceiro da Insua ten uns 20m de diámetro e apréciase no lateral sureste do túmulo o que podería ser o cono de violación.
Enlace fotos Dolmen de Penabor: https://photos.app.goo.gl/rKjcq5JzmUDvZQeY8
Enlace fotos Mámoa da Insua: https://photos.app.goo.gl/NUn3o49bWimmhoHx8
A apertura de pistas e remocións de terras puideron danar o Castelo de Penaflor, Ben de Interese Cultural.
Mariña Patrimonio vén de denunciar perante a Dirección Xeral do Patrimonio posibles danos no Castelo de Penaflor, situado no lugar de Machín, parroquia de Santa Marte de Meilán, en Riotorto (Lugo).
Segundo puideron comprobar membros de Mariña Patrimonio, na zona norte deste Ben de Interese Cultural realizáronse recentemente remocións de terras con maquinaria pesada para a apertura dunha pista. As remocións de terras e a pista chegan ao interior do foxo que defendía o castelo. Por outra banda, na zona sur do xacemento abriron tamén unha pista, que sobe ata o mesmo castelo. Estes movementos de terra con maquinaria pesada chegaron ata os muros, que forman parte deste ben patrimonial protexido, o que puido provocar o derrube dalgúns tramos dos muros. Así mesmo, na parcela onde se atopa o Castelo de Penaflor acondicionouse o terreo con maquinaria pesada para a plantación de eucaliptos. Esta acción puido deixar soterrado parte do antigo e orixinal camiño de entrada ao castelo.
Mariña Patrimonio sospeita que estas actividades, que probablemente non conten coa preceptiva autorización da Consellería competente en materia de patrimonio, puideron danar e alterar este ben patrimonial, polo que lle solicita á Dirección Xeral de Patrimonio que se adopten as medidas oportunas para que se proceda á restauración das zonas afectadas, así como a apertura do correspondente expediente sancionador. Ademais, dende esta asociación presentaron outra denuncia no Concello de Riotorto por posible infracción urbanística, dado que tanto as remocións de terras como a apertura das pistas previsiblemente non conten coa autorización municipal correspondente.
