O
pasado xoves rematou a escavación arqueolóxica no xacemento de O
Coído, situado no lugar de Pedrosa - Cuíña (San Cibrao – Cervo),
promovida por Mariña Patrimonio e realizada pola empresa Gabinete e
Arqueoloxía e Xestión do Patrimonio. As sondaxes arqueolóxicas,
dirixidas pola arqueóloga da Universidade de Santiago, María
Martín, confirmaron a existencia dun importante xacemento, no que se
achou unha inxente cantidade de restos cerámicos. A cerámica, xunto
con outras mostras recollidas no sitio arqueolóxico, serán
estudadas na Universidade de León e mais no Museo Arqueolóxico de
Vilalba.
Cando
Mariña Patrimonio descubriu en 2010 a existencia de abuntantes
restos cerámicos en supercie no lugar de O Coído, informou do
achado e solicitou á Dirección Xeral de Patrimonio a súa inclusión
no Catálogo de Bens Patrimoniais. Posteriormente, en 2018, o
colectivo alertou á DXPC de que o uso de maquinaria pesada na corta
de eucaliptos estaba a danar o xacemento e informou que nas rodeiras
da maquinaria se apreciaban centos de fragmentos cerámicos, polo que
novamente se solicitaba a catalogación do xacemento e a súa
protección. Debido á vulnerabilidade e á falta de protección
deste sitio arqueolóxico, Mariña Patrimonio promoveu a
investigación arqueolóxica do xacemento do Coído, cuxa escavación
se acaba de realizar, para o que contou coa axuda da Vicepresidencia
da Deputación de Lugo e a colaboración do Concello de Cervo. Os
resultados desta investigación dilucidarán se os restos cerámicos
atopados no Coído se remontan á Idade do Bronce, como apuntan
algúns arqueólogos, ou datan da Idade Media, como sosteñen outros.
Independentemente da súa datación, os técnicos coinciden en
destacar a relevancia deste interesante xacemento arqueolóxico.
