4/22/2019
O COLECTIVO PENSAMENTO E SEMENTEIRA E A ASOCIACIÓN MARIÑA PATRIMONIO ORGANIZAN UNHA CONFERENCIA SOBRE AS BATERÍAS COSTEIRAS DE VIVEIRO.
O vindeiro 25 de abril, xoves, ás
20h.00 na sala da planta baixa da Biblioteca Municipal de Viveiro
terá lugar a conferencia O sistema defensivo litoral no
Cantábrico galego. Séculos XVII-XVIII. O caso de Viveiro- Celeiro,
que impartirá o
historiador Xosé María Leal Bóveda. A actividade, que conta
coa colaboración do Concello de Viveiro ten como finalidade dar a
coñecer as baterías costeiras de San Xoán e de Celeiro. Estes
importantes bens culturais non gozan na actualidade de protección,
polo que a asociación Mariña Patrimonio solicitou a súa inclusión
no catálogo de bens patrimoniais en marzo de 2018. Malia o tempo
transcurrido, a citada asociación non recibiu aínda ningunha
resposta por parte de Patrimonio.
A batería de Celeiro, a mellor
conservada, podería verse afectada polo corredor da costa norte, de
levarse a cabo o proxecto de construción dunha ponte sobre a ría de
Viveiro.
Enlace fotografías estado actual
das baterías e documentación antiga:
4/17/2019
CONFERENCIA SOBRE AS BATERÍAS COSTEIRAS DE VIVEIRO A CARGO DO HISTORIADOR XOSÉ MARÍA LEAL
A actividade, organizada polo
colectivo Pensamento e Sementeira e maila a asociación Mariña
Patrimonio, terá lugar o xoves 25 de abril en Viveiro.
4/14/2019
MARIÑA PATRIMONIO CELEBRA A RETIRADA DOS 13.000 METROS CÚBICOS DE TERRA QUE SEPULTAN A ESTRUTURA CIRCULAR DE XOVE (LUGO)
Os
técnicos de Cultura, a pesar das dimensións do depósito de terra,
non apreciaran ningunha alteración neste xacemento arqueolóxico.
En 2015 Mariña Patrimonio
descubrira a estrutura circular de Lavandeira en Xove e solicitara a
súa inclusión no Inventario de Xacementos Arqueolóxicos. Tras a
inspeccion do lugar, o Servizo de Patrimonio redactou unha ficha
normativizada do Inventario de Xacementos Arqueolóxicos da DXPC,
quedando este lugar unicamente como “referencia”.
Cando
Mariña Patrimonio descubriu este sitio arqueolóxico, a metade
da estrutura circular fora xa sepultada polo corredor costeiro entre
San Cibrao e Celeiro. Lamentablemente, o estudo arqueolóxico
elaborado para a realización deste corredor non detectara o
xacemento arqueolóxico.
Trala
comunicación destes feitos á Dirección Xeral de Patrimonio por
Mariña Patrimonio, en 2017 realízanse catas que
confirman
a existencia dun xacemento
arqueolóxico da Idade do Bronce.
Agora
a Xunta
ben de licitar por 212.000 euros as obras para retirar a terra
acumulada sobre este ben patrimonial.
A
asociación Mariña Patrimonio considera que conseguir que se
revirta esta agresión e que se restableza a estrutura arqueolóxica
ao seu estado anterior é, sen dúbida, unha moi boa noticia para o
patrimonio e un triunfo para todas as persoas que intentan defendelo.
Mais tamén ve unha certa derrota ao comprobar a reiterada
incapacidade institucional para artellar políticas eficaces de
protección do patrimonio.
O
feito de non ter detectado a estrutura circular de Lavandeira, que
era facilmente visible, tanto nas fotografías aéreas coma sobre o
terreo, proba que non se actúa todo o ben que se debería. Ademais
cómpre ter en conta que corrixir este erro vai custar 212.000€,
que saen dos petos de todos.
Mariña
Patrimonio aproveita para chamar a atención sobre a información que
aparece na ficha do inventario da estrutura circular, na que os
técnicos da Conselleria de Cultura sosteñen que a “mesta
vexetación que cobre a zona impide apreciar o grao de conservacion
desta estrutura”. Sorprende que
a pesar da vexetación puideran ver o recinto circular, que ten
“unha altura duns 80 a 90 cm” e, pola
contra, non se decataran de que a estrutura circular de Lavandeira
tiña a metade da súa superficie sepultada por un
terraplén de mais
10m de alto.
Para
Mariña Patrimonio é preocupante que os técnicos de Cultura de
Lugo non apreciaran alteracións na estrutura circular, tal como
recollen na ficha do inventario, e que non se decataran da gran
acumulación de terra (13.000 metros cúbicos, segundo datos da
Xunta), depositada sobre un xacemento arqueolóxico de tan só 50
metros de diámetro .
Ficha normativizada do Inventario do xacemento de Lavandeira
4/08/2019
A CONSELLERÍA DE CULTURA NON PROTEXE UN XACEMENTO DA IDADE DO BRONCE EN CERVO
Malia
a que en 2010 Cultura comprobou a existencia de restos arqueolóxicos
nesta zona, na actualidade segue sen adoptar as medidas necesarias
para protexer este ben patrimonial.
ADEGA
e Mariña Patrimonio informaron a comezos do pasado mes de febreiro
ao Servizo de Patrimonio de Lugo e ao Concello de Cervo sobre os
movementos de terra que se estaban a producir durante os labores de
limpeza dunha finca en Cuíña, situada a escasos metros dunha zona
onde se atopan restos arqueolóxicos. Estes movementos poderían ter
afectado o sitio arqueolóxico, no que se aprecian centos de
fragmentos de cerámica que, segundo varios arqueólogos consultados,
datarían da Idade do Bronce.
Este
importante e singular xacemento foi descuberto por Mariña Patrimonio
en 2010,
data na que xa se informara ao Servizo de Patrimonio de Lugo da súa
aparición ao tempo que se lle solicitara a súa catalogación e
protección. Trala inspección do lugar, no informe elaborado daquela
por Patrimonio dicíase “
O día 26/04/2010
os técnicos do Servizo de Patrimonio Cultural deste Departamento
Territorial realizaron unha inspección do lugar indicado e atoparon
unha concentración notable de cerámica
(...)”.
Curiosamente,
malia a que o
Servizo de Patrimonio de Lugo constatou a existencia desta
concentración notable de cerámica, non tramitou o procedemento de
inclusión do xacemento no catálogo, quedando desprotexido este ben
patrimonial.
A
comezos de 2018, o paso de maquinaria pesada por esta zona
arqueolóxica desprotexida provocou novamente o afloramento dunha
inxente cantidade de fragmentos cerámicos, polo que se contactou
nesta ocasión co Concello de Cervo para informar sobre a anómala
desprotección deste importante xacemento. Así mesmo, en diferentes
reunións mantidas en 2018 con membros da Dirección Xeral de
Patrimonio en Santiago, Mariña Patrimonio e ADEGA expresaron a súa
preocupación pola incomprensible
desprotección
deste e doutros bens patrimoniais da Mariña.
Ambas
asociacións valoran moi positivamente a receptividade do Concello de
Cervo e do seu alcalde para procurar que este depósito de cerámica
da Idade do Bronce se protexa adecuadamente. Ademais, destacan a
rapidez coa que o Concello paralizou os movementos de terra que se
estaban a realizar nas inmediacións deste depósito arqueolóxico
durante a limpeza dunha finca.
ADEGA
e Mariña Patrimonio agardan que a Dirección Xeral de Patrimonio
actúe coa mesma dilixencia, recolllendo canto antes os restos
arqueolóxicos diseminados polo lugar e que corrixa o posible
erro
do Servizo de Patrimonio de Lugo, que non catalogou este ben
patrimonial do que teñen constancia dende o 2010.
3/28/2019
CULTURA RECOÑECE QUE UNHA CANTEIRA EN MONDOÑEDO OCUPOU ZONAS PROTEXIDAS DO CASTRO DE TRINIDADE E DO CAMIÑO DE SANTIAGO
A
Consellería de Cultura abre dilixencias informativas sobre este caso
e contradí cos seus informes os emitidos no seu día polo Servizo de
Patrimonio de Lugo.
Ó
redor do Castro da Trinidade1
Como
resultado das denuncias presentadas polas asociacións ADEGA e Mariña
Patrimonio, a Subdirección Xeral de Protección do Patrimonio
Cultural enviou un documento ao Concello de Mondoñedo onde se
informa que “con motivo das dilixencias
informativas abertas
por explotación de canteira no lugar de Vilamor” esta canteira
“ocupa
terreos do ámbito protexido do xacemento Castro da Trinidade,
alterando substancialmente o terreo e subsolo, sen que dita
intervención teña amparo dunha autorización desta
Administración”.
Neste
mesmo documento recoñécese que dita explotación
ocupa tamén “superficie do territorio histórico do Camiño de
Santiago do Norte”.
Por
outra parte, Patrimonio sinala que este ben patrimonial está
catalogado e que en 1997
establecéranlle límites á canteira para protexer a mencionada zona
arqueolóxica.
Esta
documentación da Subdirección Xeral de Patrimonio baséase nos
informes realizados por arqueólogos da Dirección Xeral de
Patrimonio de Santiago. Uns informes que contrastan,
contradín e mesmo deixan en evidencia os elaborados polo Servizo de
Patrimonio Cultural de Lugo. Desde
o Servizo provincial pretendíase
demostrar a inexistencia do sitio arqueolóxico, así como xustificar
as desfeitas provocadas por Canteras Santa Cecilia, argumentando que
se trataba dunhas “antigas remocións de terras” nunha “canteira
hoxe abandonada”.
Cómpre
lembrar que o Servizo de Patrimonio de Lugo mesmo tiña solicitado a
descatalogación deste sitio arqueolóxico; descatalogación e
desprotección que non se chegou a materializar porque o Servizo de
Lugo posiblemente non tiña seguido os procedementos legais para
conseguilo. A
descatalogación do xacemento conlevaría uns beneficios económicos
moi elevados para a empresa propietaria da canteira e legalizaría a
posible situación irregular, derivada da ocupación e explotación
dunha zona arqueolóxica protexida.
En
2018 ADEGA e Mariña Patrimonio denunciaban
perante a Fiscalía
a posible ocupación e destrución do sitio arqueolóxico pola
canteira, así como o intento de desprotección do xacemento por
parte do Servizo de Patrimonio de Lugo, achegando ambas asociacións
probas que contradín os informes elaborados por este Servizo. Agora
é a propia Dirección Xeral de Patrimonio a que achega probas dos
posibles danos no Castro de Trinidade e no Camiño de Santiago,
deixando en evidencia o Servizo de Patrimonio Cultural de Lugo.
3/14/2019
VISITA POLO PATRIMONIO CIVIL E RELIXIOSO DE FOZ
O
vindeiro 30 de marzo Mariña Patrimonio organiza unha visita guiada a
Foz para coñecer o seu patrimonio civil e relixioso. Nesta visita,
ademais de percorrer lugares emblemáticos da vila, achegarémonos
ata a Frouxeira, San Martiño e Vilaronte.
De
haber un número suficiente de persoas interesadas en participar
nesta actividade, os desprazamentos faríanse en bus, que sairía de
Viveiro e faría paradas intermedias ata chegar a Foz. As persoas que
veñan doutra zona, e tamén as de Foz, poderían incorporarse ao bus
para desprazárense ata os diferentes lugares da visita.
Antes
de reanudar as actividades da tarde, haberá un xantar no que poderán
participar todas as persoas que o desexen.
Para
poder organizar axeitadamente esta saída, a data límite para
anotarse é o próximo xoves 21 de marzo, indicando o nome, se é
socia/o ou non, así como as opcións que lle interesen respecto ao
bus e ao xantar. O venres 22 de marzo informarase sobre o importe
que se deberá ingresar en función das opcións elixidas.
A
xornada desenvolverase ao longo da mañá de 10.00h a 14.00h e
continuará pola tarde de 16.00h a 19.00h.
11/25/2018
ALTA PARTICIPACIÓN EN CERVO NA CELEBRACIÓN DO DÍA INTERNACIONAL DO PATRIMONIO MUNDIAL.
O
pasado 23 de novembro tiveron lugar dúas actividades relacionadas
coa exposición de útiles do paleolítico, a cal permanecerá aberta
na Casa do Concello de Cervo ata o día 30 de novembro. Nas
actividades da mañá participaron arredor de cincuenta alumnos do
IES Marqués de Sargadelos quen, ademais de asistir a unha charla do
director do Museo de Prehistoria e Arqueoloxía de Vilalba, Eduardo
Ramil, participaron nunha clase práctica de fabricación de útiles
líticos e posteriormente tiveron a oportunidade de elaboraren
algunha destas ferramentas.
Xa
pola tarde, no Salón de Plenos do consistorio, Eduardo Ramil
pronunciou diante dunhas cincuenta persoas unha interesante
conferencia sobre quen eran, como vivían e que pegadas nos deixaron
os primeiros poboadores da Mariña.
Pola
exposición tamén pasou o xoves 22 de novembro o alumnado do colexio
de Cervo; un total de oitenta e dous nenos e nenas que, ademais da
visita guiada, participaron nun obradoiro de elaboración de útiles
do paleolítico.
A
exposición, así como as distintas actividades de divulgación
organizadas por Mariña Patrimonio e a Asociación Cultural Fervenza
de Sargadelos, enmárcanse na celebración do Día Internacional do
Patrimonio Mundial como resposta á iniciativa da Rede do Patrimionio
Cultural. Na súa realización contou coa estreita colaboración da
Asociación de Amigos do Museo de Vilalba, do Museo de Prehistoria e
Arqueoloxía de Vilalba e mais do Concello de Cervo.
As
asociacións organizadoras queremos agradecerlles tanto ao director
do Museo de Vilalba, Eduardo Ramil, coma ao concelleiro de Patrimonio
de Cervo, Alfredo Fernández, a súa colaboración e implicación na
divulgación do noso patrimonio.
11/14/2018
EXPOSICIÓN DE ÚTILES LÍTICOS DO PALEOLÍTICO EN CERVO NO DÍA INTERNACIONAL DO PATRIMONIO.
Con
motivo do Día Internacional do Patrimonio Mundial, que se celebra
o16 de novembro, as asociacións culturais Fervenza de Sargadelos e
Mariña Patrimonio sumámonos á iniciativa da Rede do Patrimonio
Cultural para conmemorar esta efeméride.
A nosa
achega consistirá nunha exposición de útiles do paleolítico,
achados nos últimos anos de forma casual en distintos lugares da
Mariña. Estes útiles serán depositados, rematada a exposición, no
Museo Arqueolóxico de Vilalba, seguindo as indicacións de
Patrimonio.
A
exposición poderase visitar do 16 ao 30 de novembro na Casa do
Concello de Cervo, de luns a venres, en horario de 9.00H a 14.00H.
Por outra banda, o 23 de novembro está previsto realizar pola mañá
unha actividade con alumnado do IES Marqués de Sargadelos que,
ademais de visitar a exposición, asistirán a unha charla
informativa sobre o paelolítico e participarán nun obradoiro de
fabricación de útiles líticos. Ese mesmo día pola tarde, ás
20.00h, o Director do Museo Arqueolóxico de Vilalba, Eduardo Ramil
Rego, impartirá unha conferencia sobre os primeiros poboadores de A
mariña.
Tanto
a exposición coma os diferentes actos, contan coa colaboración do
Museo Arqueolóxico de Vilalba, da Asociación de Amigos do Museo de
Vilalba e mais do Concello de Cervo.
11/11/2018
Ensinando o patrimonio da Mariña.
Fotos: https://www.flickr.com/photos/97739145@N05/albums/72157700222358302
Subscrever:
Mensagens (Atom)